“Zero Zabor” saria auzo-konpostaren Usurbilgo familia aitzindariei

Atalak: Aldundiak, Auzolaneko konpostaketa, Udalak

Usurbilgo familia aintzindariak saria jasota Errazkin diputatuaren eta Martin Garitano diputatu nagusiaren ondoan. (Argazkia: GFA)

Gipuzkoako Foru Aldundiak Zero Zabor saria eman die lurralde honetan auzo-konposta egiten aitzindariak izan diren familia usurbildarrei. 2011ko azaroan ekin zioten Usurbilgo udalak Erreka Txikin utzitako gunean etxeko organikoak ongarri bihurtzen auzolanean. Geroztik, Gipuzkoa osora zabaldu da orain saritutako jarduera hau. Iaz ARGIAk eskaini zion LARRUN berezia gaiari: “Konpostgileak: birziklatzen txapeldun“.

Gipuzkoan gaur egun 43.837 herritarrek beren materia organikoa konpostatzen dute etxeko konpostagailuez edo auzokonpostatze sistemez. Hau da, laster, agintaldi hasierako kopurua bikoiztu egingo da (24.029 ziren 2011n).

GFAko Ingurumen diputatu Iñaki Errazkinek esan duenez, hondakinen kudeaketa egoki baten gakoa materia organikoa da. Horregatik, eredugarritzat jo ditu beren materia organikoa konpostatzen duten herritarrak, izan ere, “ingurumenarekiko arduraz jokatzen dute eta baliabideak aurreztea ahalbidetzen dute”. Martin Garitanok berriz adierazi du: “Gipuzkoa iraunkorra, solidarioa, arduratsua, justua egin nahi dugu. Aberastasuna banatu behar dugu. Zorrotz erabili behar dugu diru publikoa. Zerbitzu publikoak indartu behar ditugu. Ustelkeria borrokatu behar dugu. Politika iraunkorrak sustatu behar ditugu. Batzuk tematuta daude, oraindik ere, errezeta zaharrekin, baina herritarrek sortutako olatua geldiezina da”.

Herritarrek egindako konpostaren gorakada Gipuzkoan. (Irudia: GFA)