Ondarroan esperientzia berria: organikoa borondatezko Atez Atekoan

Atalak: Bizkaia, Udalak

Laster Ondarroan Atez Ateko borondatezkoa

[Pello Zubiria Kamino] Borondatezko gaikako bilketa herri askotan egiten da, baina horietan beti organikoa kaleko edukiontzi handietan bildurik. Ondarroan esperientzia berria egingo dute hala nahi duten familiei udalak organikoa ataritik bilduta. Nola deitu ahalegin honi, “Borondatezko Atez Atekoa” akaso?

Ondarroako Udalak berak “Nahi duzu etxeko jateko hondakinak ate aurrean jasotzea?” oharrean honela azaldu du herritarrei egin dien konbitea: “Ondarroako Udalak ate aurrean jasoko dizkie etxeko jateko hondakinak nahi duten herritarrei, astean hiru bider, eta goizez. Jasotako hondakin horiekin konposta egingo da, eta ongarri hori udala Larruskainen landatzen ari den baso autoktonoan erabiliko da. Horrela, lurrak emandakoa lurrari bueltatuko zaio”. Albistea honela eman du Hitzak: “Hondakin organikoak atez ate jasotzen hasiko da Ondarroako Udala“. Zero Zabor i.b.e.k egindako balorazioa hemen irakur daiteke: “Ondarroako Udalak ate aurrean jasoko die organikoa nahi duten herritarrei“.

Ondarroako hondakinen azterketan aipatua zuten herrian ezin zela edukiontzi gehiago sartu eta hori izan liteke organikoa modu horretan batzen hasteko arrazoia, bostgarren edukiontziari heltzeko ordez. Bestetik, pentsa liteke oraingoa urrats bat dela aurretik Bilduko udalak iragarria zuen hurrengoari (Atez Atekoa bilketa ezartzea herrian) bidea errazteko. Laster ikusiko dira borondatezkoaren emaitzak eta balizko bigarren urratsak hurrengo legealdiari itxaron beharko dio.

[P.S.] Gorka Camara irakurleak (mila esker adi egoteagatik) bidalitako informazioari esker jakin dugu Ondarroakoaren antzeko esperientzia ari direla egiten duela bi urtetik hona Bizkaiko beste herri batean, Berrizen. Horretaz xehetasun gehiago, ondoko loturetatik:
“Birziklatzea posible dela frogatzeko: ‘Berriziklatu’” (Hitza)
“Berriziklatu. Hondakin organikoa aberastasun bihurtzen” (Zero Zabor i.b.e.)