Zestoan lanean hasia da Osinbeltzeko Proiektuaren Jarraipen Batzordea

Atalak: Aldundiak, Gizarte eragileak, Osinbeltz, Plangintza, Politikariak, Udalak

Osinbeltzeko Proiektuaren Jarraipen Mahaiaren bilera. (Argazkia: Zestoako Udala)

Hedabideetan gainerako iritzi, erreakzio eta zalaparten artean oharkabean pasatu den arren, dagoenekoz lanean ari da Zestoan Osinbeltzeko Proiektuaren Jarraipen Batzordea. Horren lehen lanen xehetasun batzuk eman dituzte Hitzak “Zestoan lanari ekin diote” albistean eta Diario Vascok “Osinbeltzeko proiektuaren partehartze prozesua 2015eko azaroan amaituko da” titulutzat daramanarekin.

Zestoako Udalak bere webgunean “Osinbeltz Proiektuaren Jarraipen Mahaia” atalean biltzen ditu orain arte sortu dituen albisteak. Hor adierazten da, esaterako, GHKko lehendakari Ainhoa Intxarraundieta Zestoan egoten da astean bitan, herritarren zalantzak argitzeko, astelehen eta asteazkenetan, 17:00etatik 19:00etara. Udalak sarean jarrita dauka, era berean, Mahaiak azaroaren 18an egindako lehen bileraren akta. Bertan irakur daitekeenez, Mahaiaren bileran parte hartzen dute honako erakunde eta elkarteek:
– Zestoako udala (alkatea, alkateordea eta zinegotzia)
– Gipuzkoako Foru Aldundia (Ingurumen diputatua eta Herritarren Partaidetzako zuzendaria)
– GHK (lehendakaria eta lehendakariordea)
– Natur taldea
– Mendi taldea
– Hondakinen Mahaia
– Auzoetako ordezkariak (Iraeta, Arrua Goia, Aizarna)
– Merkatarien elkartea
– Zestuako Harrobia Plataforma
– Guraso Elkartea
– EHBildu

Lehenbiziko bileraren akta interesgarria da ezagutzeko orain arte gai honen inguruan egin diren urratsez alde ezberdinek dauzkaten iritziak eta hurrengo urratsak zein izango diren. ARGIAk jakin duenez atzo, abenduak 2, egin du bigarren bilera Jarraipen Mahai honek.