Zero Zabor, Eguzki eta Koordinadorak EAJ salatu dute TMBa eragozteagatik

Atalak: Gizarte eragileak, Plangintza, TMB

Zero Zabor, Koordinadora eta Eguzkiko ordezkariak prentsaurrekoan. (Argazkia: Zero Zabor i.b.e.)

[Pello Zubiria Kamino] Zero Zabor ingurumenaren babeserako elkarteak, Eguzkik eta Errausketaren Kontrako Gipuzkoako Plataformen Koordinakundeak Donostiako udalean emandako prentsaurrekoan beren haserrea azaldu dute Eusko Jaurlaritzak Zubietako TMB proiektuari ingurumen baimen bateratua (IBB) ukatu diolako. Erakundeok salatu dutenez, “errauste planta kutsagarri bat eta TMB planta bat zeuzkan proiektu batek baimena edukitzea, eta, ordea, TMBa soilik eraikitzeari baimen hori ukatzea zentzurik gabea da”, eta EAJri aurpegiratu diote instituzioak erabiltzen ari dela datozen hauteskundeei begira abantaila politikoa lortzeko. Eusko Jaurlaritzak argudiatu dituenez arrazoi teknikoak IBB horiek luzatzeko, hau erantzun diote hiru erakundeek: “Ingurumen baimen bateratua luzatzeari uko egin dio Eusko Jaurlaritzak proiektuak aldaketa “sustantzialak” izan dituela argudiatuta. Eusko Jaurlaritzarentzat ez zen arazo izan ingurumen baimen bateratua eman zitzaion proiektuan errauste plantatik ateratako eskoriak tratatzeko azaltzen zen planta, gerora onartu zen proiektuan desagertzea, eskoria horiek tratamendurik gabe utziz, eta aldiz, orain, materia organikoa erraustu beharrean gaika bildu eta konpost bilakatzea arazo bihurtu da, norentzat eta ingurumen sailarentzat”. Hondakinen gaian Jaurlaritzak Bizkaian eta Gipuzkoan jokabide oso ezberdinak darabiltzala ere salatu dute erakundeok, Jaurlaritzari egotziz Bizkaiko Zalla eta Alonsotegin kutsadura eragiten duten zabortegien aferan eskurik ez sartu izana. Horrek daramatza herritarrei oharraraztera: “Dagoeneko, zabortegien itxiera urtebetez atzeratzea eragin du Eusko Jaurlaritzak TMBaren baimenaren inguruko erabakiarekin eta, hauteskundeetarako hilabete batzuk falta direla ikusita, kalte handiagoa egin dezaketen erabaki sorta programatuta ote dagoen kezka adierazi nahi dugu publikoki”.

Bezperan, abenduaren 3an, EAJk helegitea jarri dio Gipuzkoako Foru Aldundiak hondakinen plangintzan egindako aldaketari, Diario Vascok zabaldu duenez: “El PNV recurre el plan foral de infraestructuras de residuos de Gipuzkoa“.

Albistearen oihartzun gehiago:
“Erakundeak “hauteskunde onurak” bilatzeko erabiltzea leporatu diote EAJri” (Berria) “Prentsaurrekoa: Herri eragileak TMB plantari IBB luzatzea ukatzearen inguruan” (Zero Zabor i.b.e.)