Tolosak sistema berriarekin %70a birziklatzea lortu du lehen hilabetean

Atalak: Derrigorrezkoa edukiontzi txipdunetan, Udalak

Tolosako alkatea eta mankomunitateko arduradunak emaitzak prentsari azaltzen. (Argazkia: 28Kanala)

Tolosak, bere alkate Ibai Iriartek jakinarazi duenez, hondakinen gaikako sistema jarri eta lehenbiziko hilabetean gainditu du %70ko birziklatze tasa. Duela hilabete arte, borondatezko sistemarekin, %26an zebilen Tolosa, bere eskualdeko hiri handiena eta Tolosaldeko biztanleen %30 biltzen dituena.

Ingurumenari dagozkion mesedeez gain, udaleko agintariek azpimarratu dituzte ekonomia aldetik herriak jasoko duen onura. Mankomunitateari udalek bi modutan pagatzen diote, batetik kopuru finko bat biztanle kopuruari dagokiona, eta bestetik sortutako hondakinaren -errefusaren- tratamenduari dagokiona, mankomunitateari entregatutako tonen araberakoa. Azken honen faktura nabarmen jaitsiko zaio Tolosari eta jaitsiera horrek ahalbideratuko du sistema berriarentzako egindako inbertsioak urte betean pagatu ahal izatea.

Jakina da Hegoaldean -ez horrela Europako leku askotan, non herritarrek hondakinengatiko zerbitzua osorik pagatu behar baitute legez- herritarrek ez dutela zerbitzua osorik pagatzen zaborragatiko tasekin; falta dena ere funtsean herritarrek pagatzen dute beren zergekin, baina udalen eta beste administrazioen gastuen artean kamuflaturik joaten da. Sistema zaharrarekin hondakinen zerbitzua Tolosan 1.725.000 euro kostatu zen eta herritarren zergetatik 1.175.000 bildu, 550.000 euroko defizita utziz. Sistema berriarekin, udalak aurreikusiaren eta prentsaurrekoan azaldutako datuen arabera, 1.400.000 euro kostatuko da zerbitzua eta herritarrek tasetan 1.200.000 ordainduko dituzte, defizita 200.000 eurotara murriztuz, aurrekoaren herena baino zerbait gehiago.

Albistearen oihartzunak:
“Hondakinen bilketa sistema berriarekin %70eko birziklatze tasara iritsi da Tolosa” (Tolosako Udala)
“Hondakinen %70 sailkatzera iritsi dira tolosarrak sistema berriarekin” (Tolosaldeko Ataria)
“El nuevo sistema mixto eleva al 70% la tasa de reciclaje en Tolosa” (Noticias de Gipuzkoa)
“El gobierno cifra en un 70% el nivel de reciclaje con el nuevo sistema” (Diario Vasco)
“Tolosako udalari eta tolosako herritarrei zorionak gaikako bilketan %70eko emaitza lortzeagatik” (Zero Zabor i.b.e.)