Olaztin hondakinak erretzeko baimena ezabatzea eskatu du Sustrai Erakuntzak

Atalak: Errausketa, Nafarroa, Plangintza, Porlan fabriketan

Errausketaren aurkako protesta 2012ko abenduan Altsasun. (Argazkia: Olaztin Errausketarik Ez)

[Pello Zubiria Kamino] Sustrai Erakuntza fundazioak Nafarroako Gobernuari eskatu dio iraungitu eta baliogabetzat jo dezala Olaztin Portland-Valderribas korporazioak daukan porlan fabrikan etxeetako hondakinak kiskaltzeko ingurumen baimena. Une honetan egoera kontraesankor batean bizi da Nafarroa hondakinen kudeaketari dagokionez: Auzitegi Gorenak ez-legezkotzat jo zuen gobernuaren hondakin plan nagusia eta plan berria errotik idazten hasi direnen bitartean Nafarroako enpresa batek hondakinak erretzeko baimena dauka.

Sustrai Erakuntzako Martin Zelaia joan den otsailean Sakanako mankomunitatearen arduradunen erdian prentsari azaltzen Nafarroako Hondakin Plan Nagusia Auzitegi Gorenak ezabatu egin zuela. (Argazkia: Guaixe)

Hondakinez hitz egiteko autoritate berezia dauka Sustrai Erakuntzak, bere laguntza juridikoarekin lortu baitu Sakanako Mankomunitateak Madrilgo Auzitegi Gorenean atzera botatzea gobernuaren hondakin plan nagusia. Plan honek aurreikusten zuen foru komunitateko hondakinetako asko errauste planta batean kiskaltzea, baina zehaztu gabe instalazioa ez nolakoa izango zen eta ez non kokatuko zen. Gero, ziurrenik krisi ekonomikoak proiektuaren bideragarritasunik eza are nabarmenago bistaratu zuelako, Iruñeko exekutiboak baztertu zuen hondakinentzako errauskailu berezi bat eraikitzea eta hobetsi zuen tratua egitea Portland-Valderribasekin, 2013an berari emanez errausketarako baimena.

Guaixe aldizkariak hau dio Sustrai elkartearen agerraldiaren kronikan: “Sustrai Erakuntzatik azaldu dutenez, plan berrian errauskailua eta errausketa baztertu egin dira. ‘Baina hiri hondakin solidoak Olatzagutiko porlandegian errausteko aukera mantentzen dela ikusten dugu’. Bestalde, jakinarazi dute biharko [ekainaren 25eko] bilerarako txostenean Nafarroako Gobernuak hiri hondakin solidoen errefusarekin Hondakinetatik Eratorritako Erregaiak egiteari lehentasuna ematen diola. ‘Hondakinak erregai gisa mozorrotzen dituzte eta horrek errausketarako atzeko atea zabaltzen du. Hitzak aldatuta ere, dena gauza bera da, ingurumenaren eta osasunaren kaltetan hondakinak erretzea’, salatu du fundazioak, Greenpeacerekin bat eginez. ”

Albistea beste hedabideetan:
“Porlandegian hondakinak erretzeko baimenaren baliogabetzea eskatu dute” (Guaixe)
“Sustrai pide que se declare caducado el permiso de incineración de Portland” (Gara)