Txupinazo batek sortutako zaborrak neurtu dituzte Gasteizen

Atalak: Bideoak, Birziklajea, Errefusa, Prebentzioa, Udalak

Gasteizko txupinazoaren ondorengo garbiketa lanak. (Argazkia: Gasteiz Hoy)

[Pello Zubiria Kamino] Gasteiz Hoy webguneak zabaldu duenez, Gasteizko festa nagusien hasierako txupinazoaren ondoren 14 tona bidrio (nagusiki botila) bildu dituzte garbiketa zerbitzuek. Arabarrak haserretzeko beldur izan ez bagina, titulatu genezakeen Zeledonek goardasolaz gain tona mordo bat zabor lurreratu duela bere etorreran.

Gure hiriburu guztietako jaiei hasiera ematen dieten txupinazoetan egiten den gisa berean, Gasteizkoan ere milaka botila hustuz egin dute ospakizuna herritarrek. Erabili ostean, 3.200 kilo bidrio horretarako prestatutako edukiontzietan laga dituzte, baina 10.880 kilo gehiago Andra Mari Zuriaren plazako zoruan barreiatuta utzi, udalak sarean jarri duen bideo honetan ikus daitekeenez:

Jaietan zaborrak kalean botata uztea gizarteak normaltzat jotako kirola denez, festek txukuntasunean segitu dezaten gero administrazioak gastu handiak egiten ditu garbiketan. Gasteizen, 91 langile eta 19 makina aritu dira festen hasierako 18:30etatik 19:00ak bitartean 14.000 kilo bidrioak gehi horiekin nahasian botatako plastiko, paper, organikoa eta bestelako zerrikeriak jasotzen. Hori da berez garestiak izan ohi diren festa handiei udalek ematen dieten ezkutuko finantzaketa gehigarria.

Borja Belandia Gasteizko Ingurumen zinegotziak agindu omen du heldu den urtean udalak ahalegin berezia egingo duela Gasteizko jaiak Zero Zabor ereduan pasa daitezen. Nekez kunplitu ahalko du helburua, herritarrok jaietan zerrien modu jokatzea kultura bihurtuta dagoelako, baina Gasteizko udalak aurten bai egin du ekintza bat on-ona: hiri handietako (Iruñekoak ez dira garbiagoak, ziurrenik Donostia eta Bilbokoak ere ez…) txupinazoek sortzen duten hondakinen eta gastuaren pista bat eman digu.

Gasteizko udalak jakinarazi duenez, “Garbiketa antolaketak % 2 hondakin gutxiago bildu du Andre Maria Zuriaren jaietan“.