Evo Moralesek Bolivia Zero Zaborrera hurbildu du Hondakinen Legearekin

Atalak: Amerika, Prebentzioa

Evo Morales asteazkenean Hondakinen Lege berria aurkezten. (Argazkia: Cambio)

[Pello Zubiria Kamino] Evo Moralesen gidaritzapean Bolivian landu nahi duten “Buen Vivir” garapen eredu berriaren aplikazioa iritsi da hondakinetaraino: La Pazeko gobernuak hondakinen legea plazaratu du, kutsatzea debekatu, birziklatzea derrigortu eta legea hausten dutenentzako zigorrak ezarriz.

Lehendakariak berak asteazkenean aurkeztu duen legeak bost atal nagusi eta 49 kapitulutan ezartzen ditu irizpide nagusiak hondakinen sortzeaz, produkzio eta kontsumo ereduez, horiek aldatzeko planifikazio eta koordinazioak, hondakinen aprobetxatzeaz, produktu birziklagarrien merkatuaz, eta abar. Ondorengo sei hilabeteetan garatu beharko da legea arau zehatzagoetan.

Legearen aurkezpenean Alexandra Moreira Ingurumen ministroak esan zuen bere kalkuluetan Boliviak sortzen dituen zaramen % 55,2 hondakin organikoak direla, %22 gehiago birziklagarriak eta %22,7 aprobetxatu ezin direnak. Zero Zabor ereduan ari diren herriek munduko bazter guztietan erakutsi dituzten zifrak dira. Evo Moralesek, berriz, legean are aurrerago joan beharra azpimarratu zuen, esate baterako plastikozko zorroen moda baztertu eta kontsumo eredu osoa eztabaidatu beharra.

Tiquipayan herritarrei materialak banatzen hondakinak Atez Ate biltzeko. (Argazkia: Noticias Ambientales de Cochabamba)

Gobernuaren legeei itxaron gabe badira Bolivian Zero Zabor ildoa jorratzen ari diren instituzioak. Adibidetzat balio du Valle Alto eskualdeko honek: Tiquipaya herrian hondakinak atez ate biltzen eta organikoa herrian bertan konpostatzen ari dira, Boliviako Gobernua tartean dela Kataluniako Generalitatearekin eta Atez Atekoan ari diren Herrien Elkartearekin abian daukaten elkar-laguntza hitzarmenak sustatuta.