Krimena eta zigorra GHKren tasen igoeran: Donostia +%14, Hernani +%39

Atalak: Sailkatugabeak

Donostiako edukiontzi baten azterketa 2014ko azaroan: nahasian bildutako hondakin gehienak birziklagarriak ziren. (Argazkia: Eurrausketarik Ez)

[Pello Zubiria Kamino] Gipuzkoako Hondakinen Kontsortzioan agintzen duten EAJk eta PSEk erabaki dute 2016ko tasekin zigortzea kudeaketa onena egiten duten herriak eta saritzea zabarren jokatzen segitzen dutenak. Ez da iritzi bat, errealitate gordina baizik, mankomunitate berean (San Markon) dauden bi udalerriri aurtengo ezarri dizkien igoerek erakusten dutenez.

Jakinaren gainean ez dagoen irakurlearentzako: udalei GHKk oso modu ezberdinean igo dizkie entregatzen duten hondakin tona bakoitzeko  kobratzen dizkien tasak. Zehazki, errefusaren tasak %11 igo ditu GHKk eta, aldiz, organikoarenak %44 eta %88 artean, mankomunitateen arabera. Errefusa udal guztiek ikusi dute 141,64 eurotik 157,38tara igotzen; organikoa, San Markori dagokionez, igo zaie 70,82 etik 125,9 eurotara (+%77,77). Ikusi nola eragingo dieten igoera horiek Donostiari eta Hernaniri.

Donostia da, Europako kultur hiriburu izateaz gain, Gipuzkoan hondakinak kudeatzen txarrenetakoa, donostiar bakoitzak urtean 274 kilo errefus lagatzen ditu kalean. Donostiako 186.095 biztanleek 2015ean denetara 4.624 tona organiko entregatu zuten bereizita (2014ean baino askoz gehiago, hori ere esan behar da) eta 51.206 tona errefus. Donostiak denetara (organikoa + errefusa) GHKri 2015ean tasatan 7.566.124 ordaindu zizkion eta aurten -hondakin kopuru bera sortuz gero- pagatuko dizkio  8.640.961 (+%14,2).

Hernanik, Diario Vascok fama txarra eman arren, askoz hobeto kudeatzen ditu bere hondakinak. Errefusetan 53 kilo pertsonako sortu zuten hernaniarrek 2015ean (donostiarren bostetik bat!). 2015ean Hernaniko udalak bere 19.600 biztanleek sorturiko 1.536 tona organiko entregatu zituzten eta 1.043 tona errefus. Kopuru konstanteetan, 2014eko tasetan Hernaniri ateratzen zaio GHKri pagatzea iazko tasetan 256.509 euro eta tasa berrietan 357.529 (+%39,3).

Zoriondu eta laguntzeko ordez, Gipuzkoan orain zigortu egiten dira ondoen ari diren udalak, zigorra merezi duen krimenen bat egingo balute bezala. Gauza jakina da birziklatze eta konpostatze kopuruak handitzekotan gaikako bilketan ahalegin berezia egin behar dutela lekuko administrazioek. GHKk mezu garbia zabaldu die tasa berriekin udalei: ez dizue merezi gaikako bilketan ahalegintzea, gaizki eginda -zaborrak nahasirik bilduta- merkeago aterako zaizue. Errauste plantek horrelako diru-laguntza ezkutukoak jasotzen dituzte ate-erroten gurpilean bizi diren politikariengandik.