Usurbilgo 1.185 herritarrek udalari eskatu diote erraustegiaz galdeketa

Atalak: Errausketa, Galdeketa, Gizarte eragileak, Udalak

Usurbilgo alkate Xabier Arregi -erdian, kutxa eskuetan- Erraustegia Erabakia plataformak bildutako sinadurak jaso zituen udaletxean. (Argazkia: Noaua!)

1.185 herritarren sinadurak bildu ditu Erraustegia Erabakia plataformak Usurbilgo udalari eskatzeko herriaren oso gertu Zubietan Foru Aldundiak eraiki nahi duen errauste planta erreferendumez bozkatzea.  Albistearen xehetasunak, argazki eta bideoez gain, zabaldu ditu Noaua! astekariak.

Honela azaldu du asmoa Erraustegia Erabakia taldeak: “Bada garaia gizartean hainbesteko polemika harrotzen duten gaietan herriari hitza emateko. Kultura demokratikoa sakondu behar dugu: agintariek, herriari erabakitzen uzteko ohitura hartu behar dute. Hori bultzatzeko, hainbat zubietar eta usurbildar elkartu ginen joan den azaroan, eta erraustegiaren gaian gure ahotsa entzun arazteko sinadurak biltzeari ekin genion. Gaur, 1.185 herritarrek bere enkargua ematen diote Usurbilgo Udalari: galdetu herriari ea erraustegia egitea nahi duen ala ez”.

Urtarrilaren 3oean entregatu dizkiote udalari sinadurak, eta horiek eskuetan hartzeko ekitaldian Xabier Arregi alkateak herritarrei bermatu die eginahalak eta bi egingo dituela herriari galdetu dakion: “Eskaera bat egin diguzue, kontsulta bat antolatzeko, Usurbilek erraustegia egin nahi duen edo ez erabakitzeko eta guretzat eskaera hori mandatu bat da, agindua da. Herriak eskatzen duena hona iritsitakoan, guretzat mandatuan bihurtzen da eta egin ahalak eta bi egingo ditugu mandatu hori aurrera eramateko”.