Debagoienan egonezina Gipuzkoako zaborrak Epelera eraman ditzaketelako

Atalak: Errefusa, Zabortegia

Arrasateko elkarretaratzean Debagoiena mailako plataforma baten sorrera iragarri zuten.

[Pello Zubiria Kamino] Herritar talde batek asteartean, otsailak 16,  elkarretaratzea burutu zuen Debagoieneko mankomunitateak Arrasaten duen egoitzaren atarian, “Debagoienan zabortegirik ez” aldarrikatzeko. 23an berriro bildu eta eskualde mailako plataforma antolatzeko deia zabaldu zuten.

Debagoienako jende askoren artean alarma Diario Vascoko albisteak piztu zuen, “La pugna pone el foco en Epele como lugar para verter la fracción resto” titulua zeraman albistearekin. Alegia, Gipuzkoak oraindik sortzen dituen zabor nahastuetatik 50.000 tona Kantabriara eramateaz gain, GHKko agintariek urtean 100.000 gehiago Epelen lurperatu nahi dituztela.

Bilkura publikoan irakurritako agirian zerrendatu zituzten beren arrazoiak.
– Urtean 100.000 tona zabor (hondakin nahasi) baino gehiago ekarriko dituztela Debagoienera, bertan 5.000 tona errefus baino sortzen ez dituztenean.
– Debagoienan sortutako errefusak aski garbiak direla, tratamendu txikia behar dutenak, eta aldiz gaizki ari diren herrietatik eramango lieketen zaborra organikoz beteta dagoela, horrek ekarriko dituen kutsadura guztiekin: “Hau onartzen badugu, hurrengoa zer izango da, errauste plantaren eskoriak eta errauts toxikoak ere Debagoienara ekartzea?”.
– Debagoienan lortu dutela gaikako bilketan %80ra inguratzea eta hori bera dela Gipuzkoako gainerako herriek egin beharrekoa, horrela ez  litzatekeela osotara 60.000 tona baino gehiago sortuko.
– Debagoienak lortuaren gakoa gaikako bilketa derrigorrezkoa izatean datzala.
– Posible dela emaitza bera lortzeko adostasun politikoetara iristea, Debagoienan bezala beste zenbait herritan ikusi den gisan.

Amaieran, bildutakoek zehaztu zuten nolakoa izan behar duen Debagoienak Gipuzkoako gainerako eskualdeekin izan beharreko elkartasuna: “Solidaritatez jokatu beharko genukeela ere entzun dugu batzuen ahotan, eta hain justu ere solidaritatea da guk eskatzen duguna, hau da: ‘norberak bere etxean ahal duen guztia egitea beste batzuk kaltetuak izan ez daitezen’. Izan ere, Gipuzkoako mankomunitate gehienetan ez dute % 50eko gaikako bilketa gainditzen (Txingudin eta Debabarrenan % 40a ere ez!), Debagoienan % 80 inguruan gabiltzan bitartean. Beraz, besteak arduraz jokatzen hasten direnean hasiko gara gu solidaritateaz hitz egiten.”

Beste hedabideek honela bildu dute gaia:
“‘Debagoiena Gipuzkoako zabortegi’ ez bihurtzeko plataforma eratzeari ekin diote” (Goiena)
“Herritar ugari Epelen zabortegia ez egiteko antolatzen hasi dira” (Mondraberri)
“Epeleko zabortegiaren aurkako plataforma bat osatzera deitu dute” (Berria)
“Se oponen a que Debagoiena sea “el vertedero de Gipuzkoa”” (Noticias de Gipuzkoa)
“Vecinos de Debagoiena rechazan que se abra en la comarca un nuevo vertedero para basuras” (Naiz)

Aurreko egunetan plazaratuak:
“[Itsaso Beitia] Debagoienean zabortegirik ez!” (Berria)
“Mankomunitateko lehendakariak dio lurraldeko errefusa Epelera ekartzeko aukera ez duela planteatu, gai honetan “adostasunik lortzeko ezintasuna” ikusirik“, “[Bideoa] Industria hondakinak jasotzen dituen Epeleko isurtegia bertatik bertara“, “[Enrike] Ardura, akordioa eta elkartasuna zaborrarekin”, “[Alain Solupe] Birziklapena bai Debagoienean, zabortegi kutsakorrik ez” (Goiena)
“Debagoieneko atez-atezko zerbitzuaz arduratzen diren langilegoa arduratuta dago etorkizun ezagatik” (Mondraberri)
“Censuran que Debagoiena «sea el vertedero de toda Gipuzkoa»” (Diario Vasco)