Xabier Garmendia, EAEko errauste planak antolatzen dituen gizona

Atalak: Errausketa, Politikariak

Xabier Garmendia 2011ko urrian Euskal Telebistan, Industriako sailburuorde zela. (Argazkia: ETB)

[Pello Zubiria Kamino] Aste honetako paperezko ARGIAk “Añorga+Zubieta: Donostia, errausketaren hiriburua?” kronika zabalean azaltzen da Gipuzkoako erraustegiaren aferak nola abiada berria hartu duen EAJ eta PSEk Gipuzkoako Foru Aldundiaren gobernua eskuratu ostean. Ataletako batean aurkezten da nor den Xabier Garmendia Martinez politikari eta errausketako enpresaburua, Martin Garitanoren (Bildu) agintealdian lurperatutako errauste planak 2016an berpizteko lehen urratsaren enkargua hartu duena.

Jose Ignacio Asensio diputatuak abenduaren 18an Batzar Nagusietan hitzokin aurkeztu zuen PIGRUGeko prognosia eguneratzen aritu den profesionala: “El experto en estos temas Xabier Garmendia”.

Mikel Peruarenak “Zeinek erre nahi ditu hondakinak?” liburuan azaldu zuen nor den Bizkaiko eta Gipuzkoako errauste plantak diseinatu dituena. Ikasketaz industria ingeniari, 1987tik Eusko Legebiltzarrean parlamentari Euskadiko Ezkerratik, 1991-1995 urteetan Ingurumen sailburuorde aritu zen Ardanza lehendakariarekin. 1995ean ingurumena eta herritarren osasuna zaintzeko kargua utzirik, hondakinen kudeaketari eta errausketari lotutako negozioetan murgildu zen.

Xabier Garmendia Gipuzkoako Batzar Nagusietan bere Prognosi berria aurkezten abenduaren 18an, Jose Ignacio Asensio eta Xabier Ezeizabarrenaren artean. (Argazkia: GFA)

Enpresa publiko eta pribatuetan zituen edo dituen kargu ugarien zerrendatik ale batzuk hautatzen hasita, DPA Desarrollo y Proteccion Ambiental sortu zuen, ingurumen aholkularitza zerbitzuak eskaintzeko; 1996an Eusko Jaurlaritzak DPAri pneumatiko zaharrak kudeatzeko esperientzia pilotua baimendu zion. Handik laster sortu zuen Garmendiak Neuciclaje enpresa, autoen pneumatiko zaharrak «berreskuratzeko»… erregaitzat erabiliz zementua fabriketan. Neuciclajeren administrazio kontseiluan daude Cementos Lemona eta Cementos Rezola..

2002an ISR Instituto para la Sostenibilidad de los Recursos antolatu zuen Garmendiak Estatu Espainiarrean errausketaren aldeko lobby lanak egiten dituena. “ISRk gidatu du -azaldu zuen duela bost urte Peruarenak- Nafarroako hondakinen kudeaketa plana, eta Garmendiak berak antolatu ditu Bizkaiko eta Gipuzkoako planak, San Marko eta Txingudi mankomunitateen zenbait kudeaketa plan ere bai”. ISR aurretik deitu zen Club Español de Residuos eta orain deitzen da Fundación Economía Circular, ekonomia zirkularraren kontzeptua errausketaren lobbyak Zero Zabor mugimenduari osturik.

Patxi Lopezen, Xabier Martinez eta Bernabe Unda AEBn fracking hobi bat bisitatzen. (Argazkia: El Pais)

2009an Patxi Lopez (PSE) lehendakariarekin egin zuen berriro jauzi politikara Garmendiak, orain Industria sailburuorde izateko. ETAk su-eten definitiboa iragarri zuen egunean AEBetan zegoen lehendakariarekin, fracking gasaren negozioko konpainiekin harremanak estutzen.

Ate errotetan itzuli berri bat eginez, 2015eko udazkenean Gipuzkoako Foru Aldunditik berriro deitu diote Xabier Garmendiari, Gipuzkoako errauste planta azkenean abian jar dezan.