Diputazioak Xabier Garmendiari enkargatu dio 2030 arteko Gipuzkoako Hondakinen Plan berria

Atalak: Aldundiak, Plangintza

Xabier Garmendia 2011ko urrian Euskal Telebistan, Industriako (PSE) sailburuorde zela. (Argazkia: ETB)

Maiatzaren 25eko datarekin jarri ditu Interneten “Gipuzkoako 2017-2030 Hiri Hondakinak Kudeatzeko Plan Orokorraren Ingurumen Ebaluaketa estrategikoaren hasierako agiriak” blokea osatzen duten lau dokumentuak. Horietan ageri denez, Xabier Garmendia Martinez errausketaren enpresa-gizona eta PSEko politikaria –ikusi “Xabier Garmendia, EAEko errauste planak antolatzen dituen gizona“– ari da plan berriaren zuzendaritza eramaten. Garmendiak Desarrollo Protección Ambiental, S.L enpresaren ordezkaritzat sinatzen ditu planok, CIMAS, Innovación y Medio Ambiente, S.L.L. ingurumen aholkularitzako enpresako teknikariekin elkarlanean.

Lau agirik osatzen dute Gipuzkoako Foru Aldundiak PIGRUG 2017-2030 (Hasierako Dokumentuak) atalean asteazkenean ikusgai jarritako blokea:
– “Hasierako Zirriborroa”
– “Hasierako Dokumentu Estrategikoa”
– “Formularioa V. Eranskina”
– “I. Eranskina. Prognosiaren gaurkotzea”

Lehen bi agirien hasieran azaltzen da zein den lege izateko sortutako dokumentuon “talde idazlaria”, hitzez hitz:
– Desarrollo Protección Ambiental, S.L.: Xabier Garmendia Martínez: Industria Ingeniaria
– CIMAS, Innovación y Medio Ambiente, S.L.L: Mikel Garay Ugarte: Industria Ingeniaria. Cristina Gil Giraldez: Ekonomia eta Enpresa Zientzien Liz. Miren Arretxe Zamakona: Biologia Zientzien Liz. eta Ekotoxikologian Doktorea.  Zigor García Gorrotxategi: Topografia-Ingeniari Teknikoa eta Geografian Liz.

Horiek prestatu eta Gipuzkoako Foru Aldundian Ingurumeneko Zuzendari Nagusia den Felix Joaquin Asensio Roblesek ontzat emandako planoi iradokizun edo ekarpenak aurkeztu nahi dizkieten Gipuzkoako herritar, elkarte eta erakundeek hilabeteko epea daukate maiatzaren 25etik hasita.