Erraustegiak Danimarkan: funtzionatzeko atzerritik zaborrak ekarri behar dituen eredua

Atalak: Errausketa, Europa, Gipuzkoa

Gipuzkoako Ingurumen sailaren Twitter kontuak Kopenhagen egin behar duten errauskailu baten berri eman du asteazken goizean. Foru Aldundiaren arabera, hondakinak erreko dituen plantan eski pista bat ere jarri dute.

Datozen asteotan Copenhague-n erraustegi berri bat irekiko da. Instalazioan bertan sky egiteko pista bat jarri dute. pic.twitter.com/4rFVvlGVE9

— Gipuzkoa Ingurumena (@OrainIngurumena) 2016(e)ko ekainak 7

Danimarkan errausketaren alde egin duten apustuan badira, ordea, herritarrentzat interesgarriagoak izango diren kontuak ere.

The Copenhagen Post egunkariak –Danimarkan ingelesez argitaratzen den egunkari bakarra– 2011ko artikulu batean azaldu zituen errausketaren ereduak udalei ekarri dizkien zailtasunak eta soluzio desatseginak: “Zabor nahikorik ez denentzat” izeneko artikuluan nabarmendu zutenez, Danimarkako udal ugari hondakinen premian zeuden erraustegiak elikatu ahal izateko. Atzera-bueltarik gabe, atzerritik inportatzen hasi ziren.

Ingalaterrako hondakinak Danimarkara iristen: herrialdeko 26 erraustegietatik 20k beste herrialdetako biztanleen zaborrak erretzen dituzte (argazkia: Ingeniøren astekaria).

Alemaniarrok, ekarri zuen zaborra gure etxera

Duela bost urtetik ari dira Danimarkako erraustegiak eurenak ez diren hondakinak erretzen, erraustegiaren negozio-eredua bideragarri izan dadin. Eskia egitera joan daitezkeen balizko turistak baino lehenago iritsi dira haien sailkatu gabeko zakarrak.

Gutxi gorabehera Arrasateren biztanle kopurua daukan Nykøbing Falster izan zen lehena: Alemaniako herritarren hondakinak ekartzen hasi ziren, herriak berak ez zuelako nahikoa zabor sortzen halako azpiegitura bat mantentzeko.

“Ergelkeria” gisa deskribatzen du hondakinen enpresaburuak

The Copenhagen Posten arabera problema are larriagoa da Danimarkako landa-eremuan. Jutland penintsulan, adibidez, ez zegoen populazio nahikorik erraustegia bideragarri egiteko. Ez egitea erabaki zuten? Bai zera: Britainia Handitik hondakinak inportatzeko planak egin zituzten.

“Hondakinak energia bihurtu nahi dituzten planta berrientzat milaka atzerriko zabor kamioi inportatu beharko lirateke. Horrek proiektuaren inteligentziaren inguruko kritikak eragin ditu”, dio The Copenhagen Postek. Bost urte geroago, zenbakiek dena esaten dute: Ingeniøren astekariak argitaratu duenez, Danimarkako 26 erraustegietatik 20k atzerriko hondakinekin betetzen dituzte euren labeak.

Danimarkako 26 erraustegietatik 20k atzerritarren hondakinak inportatzen ditu funtzionatzeko

“Gertatzera doana ergelkeria sozio-ekonomikoa da”, adierazi zion Palle Mang-ek Jyllands-Posten egunkariari. Nomi konpainiako zuzendaria zen Mang, hondakinen kudeaketaz arduratzen den enpresa bat: “Hasteko, ez dago zabor nahikorik dagoeneko martxan dauden errauste plantak hornitzeko”. Eta berriak egiteko planak ez dira gelditu geroztik.

Gipuzkoako hainbat eskualdetan bilketa selektiboari esker birziklatu ezin den hondakinak asko gutxitzea lortu ondoren, Danimarkako ereduarekin konparatzeak zalantza berri bat jartzen du mahai gainean: kanpotik ekarriko al dute zaborra Zubietara, erraustegiak nahikoa janari izan dezan?