Goierri BirZirik: “Gipuzkoan 232 kilo errefus sortzen dira biztanleko. Ze solidaritate mota da hau?”

Atalak: Zabortegia

[Urko Apaolaza] Mutiloan zabortegia irekitzearen kontrako plataformak manifestazioa egingo du abenduaren 18an Ormaiztegin. Goierriko jende ezagunaren babesa jaso du deialdiak.

GHK-k Mutiloan ireki nahi duen zabortegiak gero eta oposizio handiagoa dauka goierritarren artean eta gero eta antolatuago ari dira proiektuaren kontra. Hala, Goierri BirZirik plataformak manifestazioa egingo du igandean Ormaiztegin; eguerdiko 12:00etan hasita kilometro batera dagoen Lurpe isurtegira –bertan ireki nahi dute hiri hondakinentzako zabortegia– abiatuko dira trikitilari, dantzari eta erraldoiak lagun.

Deialdiak babes instituzional zabala izateaz gain –eskualdeko alkate eta zinegotzi ugarik egin dute bat– hainbat jende ezagun biltzea ere lortu du: Iker Irribarria pilota txapelduna, Pello Zabala, Elixabete Garmendia kazetaria, Jakoba Errekondo agronomo eta paisajista, Xabi Arakama musikaria, Gurutze Irizar kooperante sariduna…

Goierri BirZiriken esanetan Mutiloan ireki nahi dena “zabortegi berria” da, aurretik soilik hondakin industrial geldoak isurtzeko baimena baitzuen Cespak Lurpe eremuan. Plataformak nabarmendu du kalte larriak eragin ditzakeela Gipuzkoako zaborren gehiengoa –urtean 102.000 tona– toki horretan pilatzea, eta GHKren eta Aldundiaren informazio falta salatu du.

Gakoa birziklatzean dagoela dio plataformak, zentzu horretan, udaletan sustatu duen mozioak mezu zuzena helarazten dio herritarrari: etxeko hondakinak behar bezala sailkatzea derrigorrezkoa da. Euren esanetan Gipuzkoak arazo larria dauka zaborrekin, birziklatzen ez delako eta urtean 165.000 tona errefus sortzen dituelako: “232 kilo biztanleko, eta beraz, 19 kilo biztanleko hilabetean”.

Aitzitik, gogorarazi dute Mutiloan, Ormaiztegin eta Gabirian hilean 5,8 kilo baizik ez dituela sortzen biztanle bakoitzak hilean eta kopuru hori Gipuzkoa guztira eramanda 50.000 tonara jaitsiko litzatekeela errefus kopurua: “Arduradunek komunikabideetan Goierrik Gipuzkoari eskaini beharreko ‘solidaritatea’ aipatu dute, baina ze solidaritate mota da hau?”, dio Goierri BirZirikek.