Abenduaren 27rako protesta deia egin du Errausketaren Aurkako Mugimenduak

Atalak: Errausketa, Gizarte eragileak

Errausketaren Aurkako Mugimenduaren izenean mobilizaziorako deia irakurri zuten Malores Etxeberriak eta Maria Luisa Sanchezek. (Argazkia: Noaua!)

Gipuzkoako Hondakinen Kontsortzioak, erraustegia eraiki eta kudeatzeko lanak esleituko duen egun berean, abenduaren 27rako mobilizatzera deitu berri du Erraustegiaren Aurkako Mugimenduak. Hitzordua, hilaren 27an, eguerdiko 12:00etan Donostiako Gipuzkoa plazan, Foru Aldundiaren atarian. Usurbilgo Noaua! herri aldizkariaren bideoak bildutako prentsaurrekoan, antolatzaileek dei egiten diete gipuzkoarrei “bai agintari, ordezkari politiko eta herritarrei, erraustegi kriminal hau eta lapurreta izugarrizko hau onartu ez dezaten”.

Errausketaren Aurkako Mugimenduko kideek herritarrek abenduaren 27an beren protesta egiteko dauzkaten arrazoi ugariak gogorarazi zituzten. Batetik, “erraustegia oso kaltegarria dela osasunarentzat. Horretan medikuek lan asko egin dute eta saiatu dira gizarteratzen zer kalte dakarzkion erraustegi batek osasunari”. Bestetik, erraustegia ez dela beharrezkoa, duela urte asko demostratuta dagoelako, Usurbilen hasita beste udalerri askotan, gaikako bilketa on batekin posible dela azken errefusa pertsonako eta urteko 50-60 kg-tara murriztea, gaizki eginda 300 kg-taraino botatzen jarraitzeko ordez.

Protestarako arrazoi hauei, erraustegiak gipuzkoarrei ekonomikoki suposatuko diena erantsi behar zaie, EAMeko kideek gipuzkoarren etxeetan banatu dituzten milaka orritan zehazten den bezala: “Badakigulako honek ekonomikoki izugarrizko kostua suposatuko digula gipuzkoarroi. 35 urterako zorpetuko gaituela, eta lepotik helduta geratuko garela zor horrekin, eta ez da justua, ez da bidezkoa. Zor guztiz ilegitimo bat izango da”.