Katalunian laster 172 udalerri gehiagok ezarriko dute Atez Ateko bilketa

Atalak: Atez atekoa, Europa

Katalunian Atez Atekoaren aitzindarietakoa den Tianako udala Europar Batasunak eredugarritzat saritu du. (Argazkia: AMCPRPP)

[Pello Zubiria Kamino] Albistea Kataluniako Hondakinen Agentziaren buruak eman du abuztuan: urte eta erdiko epean 172 udalerri gehiagotan ezarriko dutela Atez Atekoa, 490.000 herritarri zerbitzu emateko.

Orain bertan Katalunian Atez Atekoan biltzen badira 107 udalerritako 300.000 biztanleren hondakinak, 2019an 800.000 inguruk funtzionatuko dute sistema horrekin. Herri horietako askok, gainera, sortzez besteko ordainketa sistema ere ezarriko dute, Agencia Catalana de Residuseko lehendakaria den Josep Maria Tosteek adierazi duenez. Horrela beteko dute Katalunian ezarritako lege berriaren eskakizun zehatz bat, alegia, hondakin guztien jatorria garbi identifikatu beharko dela. [Ageri denez, Gipuzkoan hondakinen kontrairaultzan herri batzuetan alderantzizko bidea egiten ari dira, hondakinen identifikazio eta jatorriaren pertsonalizazioa lausotzeko obsesioan].

Udalerrien tamainan ere jauzia egiten ari dira Kantalunian, gero eta handiagoetan ezartzen baita Atez Atekoa. Laster hastear dira, esaterako, Lleida hiriburuan eta hori izango da 100.000ean abiatuko den lehenbizikoa. Residuos Profesional guneak titulatu duen moduan, “Reciclar dejará de ser voluntario en Lleida“. Baina, gainera, Lleidako probintziako eskualde batzuek laster sistema hori zabalduko dute orain ari diren herrietatik guztietara.

Principatetik kanpo baina Katalan Herrialdeetan, Menorkako hiriburu Maok ere laster ezarriko du Atez Atekoa bere 29.000 biztanleentzako.

[Joxe Mari Irazustak bildutako informazioz].