Valentziako Generalitatea Atez Atekoa sustatzen hasi da

Atalak: Atez atekoa, Europa

Gaztelu ikusgarri baten jabe da Alacant probintziako Saix herria.

Valentziako Erkidegoko gobernuan Ingurumen sailburuak jakinarazi du laster hondakinen Atez Ateko bilketa ezarriko dutela Orba eta Seix udalerrietan eta horien asmoa bete-betean sustatuko duela Generalitateak, lehendakari Ximo Puig sozialista duenak.

Berrikitan iragarri zuen hondakinak porlan-fabriketan erretzea mozten joango direla, erabat eragotzi arte. Orain Julià Alvaro sailburuak, Seixeko udal agintariekin egindako bilera kontatuz, bere blogean idatzitako “La recogida de basura Puerta a Puerta ez el ‘Regreso al Futuro’» sarreran adierazi du Generalitateak Atez Atekoaren ezarketa sustatuko duela:

“Atez Atekoak hondakinen kudeaketa txukuna eragiten du, gaikako bilketari dagokionez oso emaitza onak eskainiz. Ondorioz, zabortegira doan hondakin kopurua arras murrizten da eta herritarrek pagatu beharreko faktura ere bai. Gainera, organikoa zikinik gabe biltzen da eta ematen duen konposta gero hobeto saltzea baimentzen du.

Generalitatetik ahalik eta laguntzarik handiena emango diegu bai bilketarako materialetan (kubo, poltsa, edukiontzi txiki…) eta baita kontzientziatze kanpainetan ere”.

Orbak 2.000 biztanle ditu eta Saixek 10.000 eta biak izango dira erkidego hartako lehen herriak sistema ezartzen. Katalan kulturaren eremuan Valentziako Erkidegoa da azkena sartu dena Atez Atekoaren ildotik. Bai Baleareetan eta batez ere Katalunian aspaldi jorratutako sistema da. Alvaro sailburua Equo alderdiko kidea da, Ximò Puig sozialista lehendakari duen gobernuan.