Pasaian herritarrak galdezka alkateari erraustegiaren kontratuaz eta zorraz

Atalak: Errausketa, Gizarte eragileak

Pasaitar talde bat presentatu zen udal plenoan erraustegiak herriari ekarriko dion zorraz galdezka.

Pasaiako Udalaren iraileko osoko bilkuran zenbait herritar azaldu dira alkateari galdezka ea udalak zer dakien Zubietako erraustegiak herriari ekarriko dion kalte ekonomikoaz eta zergatik ez duen informazio hori biztanleen artean zabaldu.

Joan den negu-udaberrian Gipuzkoako hainbat herritan galdetu zitzaien alkateei erraustegiak beren udalerriei ekarri behar dizkien kalte ekonomikoez. Erantzuten ez zuten alkateetako bat zen Pasaiakoa, zeinari 280 herritarrek sinatuta iritsi baitzitzaion galdera sorta. Irailaren 26ko udal plenoan azaldu ziren horietako batzuk, udalari aurpegiratzera gai hau ezkutuan gordetzeko jokabidea. Han herritarrok irakurritako gutunak dio hitzez hitz:

“Badira 6 hilabete baino gehiago, martxoaren 3tik hain zuzen, 280 pasaitarrok alkate andreari zenbait galdera luzatu genizkiola, udalean sarrera ofiziala emanez, Zubietako erraustegiaren egitasmoaren inguruan. Sei hilabete izan ditu, gutxienez herritarrokin harremanetan jartzeko. Sei hilabetetan erantzunik ez; jaramonik ez.

Ez dakigu zer den larriago, eskatutako informazioa ez ematea edota herritarronganako mesprezua eta begirune eza.

Hondakinekin dagoen arazoa aitzakia hartuta, zuen helburua, enpresa pribatu eta lobby-en interesen mesedetan, milioika euro kostako den azpiegitura eraikitzea da, nork bere etxe ondoan inork nahi ez duen erraustegia, alegia. Eraikuntza-lana eta kudeaketa pribatua izango denez, etekin ekonomikoa bermatu beharrekoa da, eta horretarako, enpresa eta lobby haien neurrira adostutako hondakin politika malgua eta jasanezina darabilzue non errausgailua elikatzeko aski zabor sortzea oinarri duen. Hala, erraustegi hori eraikitzeko Gipuzkoako herriei baldintza onartezinak ezarriko zaizkie, eta herritarrok gure poltsikotik eta gure osasunarekin ordainduko dugu gutxienez datozen 35 urteetan.

Borondatean oinarritutako edukiontzi bidezko sistema bilketa batetik sistema orokor baterako jauzia eman behar da. Baina noski, bitarteko egokiak jarrita erraustegiaren proiektua auzitan legoke. Ez litzateke bideragarria. Beraz, hondakina ez da komeni murriztea, ez berrerabiltzea eta are gutxiago birziklatzea eta konpostatzea. Guztia erraustegira!! Hiri hondakinen errausketaren aurka jarraituko dugu. Hondakinak xahutzea eta erretzea lotsagarria da.

Gaia larria delako eta alkate andrearen jarrera ikusirik, gaurko udalbatzan, galdera hauek publikoki erantzutea eskatzen diogu:

1- Zu buru zaren Udal horrek ekitaldi publikoan errauskailua eraikitzeko kontratu hori onartu edo errefusatzeko erabakirik hartu al du?

2- Udalak ohartarazi al ditu herritarrak prentsa edo bestelako hedabidez 2051 arte lotuko dituen kontratu horren ondorio eta xehetasunez? Hala izan ez bada, zergatik ezkutatu zaie herritarrei informazio hori?

3- 2051 urte arteko kontratu hori eta herritarrontzako bezala udalarentzako dauzkan ondorio larriak onartzeko edo errefusatzeko eztabaidarik eta erabakirik egon bada, gai larri honen inguruan zein iritzi azaldu dute Udalean dauden alderdi eta ordezkari politikoek, eta zein agiritan daude argitaratuta?

4- Udalean aztertu duzue hondakinen kudeaketa berriro ere udalaren eskura pasatzeko aukera? Aztertu duzue zein eragin eta ondorio izango lituzkeen hondakinen kudeaketa udalaren eskumenera itzultzeko aukerak?”