Erraustegiaren goi-tentsioko linearen protesta eraman dute Urnietatik Lasartera mendiz

Atalak: Ekitaldia, Errausketa, Gizarte eragileak

Andoain, Hernani, Lasarte eta Urnietatik iritsitako lau zutabeetako herritarrak Azkorteko Santakruz ermitaren aurrean.

Larunbatean, 27, EAM Errausketaren Aurkako Mugimenduak deitutako mendi martxa batek salatu du Zubietako erraustegia argindarrez hornitzeko Lasarte eta Urnietako mendian barrena agintariek urratu nahi duten goi-tentsioko  linea berria. Andoain, Hernani, Lasarte-Oria eta Urnietatik abiatutako lau zutabek Azkorteko ermitan egin dute topo, hemendik lehenik Oria auzora jaitsita azken ekitaldia Lasarteko plazan burutzeko.

Oria eta Urumea ibarren panorama paregabeak eskaintzen dituen Azkorteko Santakruz ermitaren ondoan azaldu dituzte antolatzaileek (ARGIAren bideoan bildu denez) proiektuaren zertzelada nagusiak. 132 kilovolteko potentzia izango duen linea berriak urtean 160.000 megawatt garraiatuko luke esklusiboki erraustegia hornitzeko. 5.422 metroko linea berria osatzeko burdinazko 21 dorre berri eraiki nahi dituzte, bakoitza 30-36 metro altuerakoa eta 50na metro koadroko eremuetan kokatuak, zelaiak urratu eta basoetan 40 metro zabalean harrapatutako zuhaitz guztiak eraitsiz.

Mendi ibilaldiaren amaierako ekitaldian, Lasarte-Oriako erdigunean, erraustegiaren aurka mobilizatutako zenbait herritar eta talde mintzatu da. Landaberri ikastolako ikasleen ordezkari gazteek agintariei eskatu diete “gure osasunarekin ez jolasteko” eta irakasle batek adierazi du azpiegitura berriaren arriskuak salatzen jarraituko dutela. Erraustegia eraikitzen ari diren gunetik 500 metrora dago Landaberri ikastola eta berrikitan irakasleek salatua dute kutsaduragatiko beren kezka azaltzen zuen pankarta bat kendu arazi egin dietela Hezkuntza ordezkaritzatik.

Landaberri ikastolako irakasle eta ikasleak beren kezka azaltzen, ikasgeletatik 500 metrora eraikitzen dietelako erraustegia. (Argazkia: @XingolaUsurbil)

Lasarte-Oriako antzerki talde amateur batek jarri nahi izan dio umore puntua egunari, atariko hesietatik errauskailuaren obrak komentatzen zituen erretretadun hirukote bat irudikatuz. Amaitzeko, EAMeko ordezkariek egin zuten azken hitzaldia, herritarrei dei eginez ez etsitzeko erraustegiaren aurkako borrokan eta hurrengo mobilizazioaren hitzordua zabalduz: Donostian otsailaren 24an burutuko dute “Erraustegia gelditu! Birziklapena sustatu!” lelopean.

Usurbilgo Noaua hedabideak bideo honetan bildu du azken ekitaldia osorik: