Zallako udalak kontuak eskatu dizkie Zabalgarbiri eta Jaurlaritzari eskoriengatik

Atalak: Errausketa, Eskoriak

Zabalgarbik Zallako Las Lagunas zabortegian botatzen ditu erraustegiak sortutako eskoria gehienak. (Argazkia: Zallako udala)

Zallako udalak azalpenak eskatu dizkie Eusko Jaurlaritzari, Bizkaiko Foru Aldundiari eta Zabalgarbi erraustegiari berari, bertako zabortegian Zabalgarbik botatzen dituen eskorien arazoa zertan datzan jakiteko. Udalak jakitera eman duenez, zabortegiaren egoera 2014an bertan salatuta dago eta orain udalak, Zero Zabor Bizkaian eta Ekologistak Martxanek jakinarazi dietenean arau urraketa bat izan daitekeenaren berri, berriro eskatu dizkie azalpenak bi erakundeei eta enpresari.

ZZB Zero Zabor Bizkaian plataformak salatu berri du 2005etik gaurdaino Zabalgarbi erraustegiak 600.000 tona eskoria –hondakin nahasiak erretzeak utzitakoak– isuri dituztela Bizkaiko zabortegietan eta hori kontrol egokirik gabe egin duela, prozesuaren kalitatea bermatzen duen Gaiker fundazioak horretarako legezko akreditaziorik ez daukalako.

Errausketaren zepa edo eskoria horiek kutsadura arazoak eragin ditzaketelako, Europako legediak eskatzen du UNE-EN 14899:2007 araua aplikatuz analiza ditzala espreski horretararako akreditatutako konpainia batek. Espainiako estatuan ENAC erakundeak ematen ditu akreditazio horiek, baina Zabalgarbiren kontrola segurtatzen duen Gaiker fundazioak ez dauka, ZZBk salatu duenez.

“Orain zabaldutako albistea egia baldin bada –dio udalak– , esan nahi du arau urraketa oso larri bat ari dela gertatzen, Zabalgarbi planta martxan jarri zenetik, 2005etik, sortu dituen eskoria guztiei eragiten dielako, milioi erdi tonari”. Zabalgarbik sortzen dituen eskoria gehienak Zallako zabortegian lagatzen dituzte.

Bestalde, Zallako udalak zabortegia kudeatzen duen Cespa konpainiari aurpegiratzen dio udan bertan gertatutako sutearen jatorriaz azalpen sinesgarri bat eman ez izana. ARGIAk bildu zuenez, abuztuan sua piztu zen Zallako zabortegian, bigarren sutea urte eta erdian, eta enpresak argudiatu zuen tximista baten ondorioz piztu zela. Orain udal agintariek diotenez, “informazioa eskatu diogu Euskalmet agentziari eta honek dio ez daukala gau hartako goizaldean Las Lagunas zabortegian tximista bakar bat erori izanaren berririk. Horregatik eskatu dugu gertakizuna zehaztasun handiagoz ikertzea”.

Incendio controlado pero de larga duración prevista, trabajamos apoyados por medios mecánicos del vertedero #bomberos #sutea #Zalla
Zallako #sutea kontrolpean, luzea izango da, bertako makinariarekin lanean laguntzeko #suhiltzaileak pic.twitter.com/MozbRONu0Z

— Bomberos y Bomberas Bizkaia (@BomberosBizkaia) August 9, 2018