OEITeko medikuek Asensio diputatuaren dimisioa eskatu dute, ETBn esandako irainengatik

Atalak: Osasuna

Osasuna eta Errausketa Ikerketa Taldeak Gipuzkoako Foru Aldundiko Ingurumen diputatu Jose Ignacio Asensioren dimisioa eskatu du publikoki: “gizartearen adimenari egindako laidoak eta GEIS/OEIT-i jaurtitako kalumniak” direla eta, edo bestela aukeran ematen dio diputatuari “agiri bat sinatzeko, non bermatzen duena erraustegiak ez duela kalterik ekarriko ondoko biztanleen osasunari, eta azaltzeko zergatik biztanle horiek behar duten jarraipen medikoa”. Medikuen erreakzio hau dator EITBk berrikitan eskainitako Katebegia programan Asensio diputatuak medikuen kontra esandakoen ondoriotzat.

Jose Ignacio Asensioren Katebegiko adierazpenak direla eta, OEITek bere dimisio publikoa eskatzen dugu.@eitbeus @GipuzkoaZutik @OrainGipuzkoa @ainhoa_GHK @ErrausAurkMugi @tgurasos #KatebegiaErraustegia pic.twitter.com/UZwceGo0mh

— Osasuna eta Errausketa. Incineración y salud. (@OEIT_GEIS) November 8, 2018

Medikuek azpimarratu dute behin eta berriz eskaini dietela beren lankidetza erraustegiaren afera erabaki behar zuten agintariei, baita Asensiori ere, baina honek ez diela sekula entzun nahi izan: “Berak ez du inoiz jakin nahi gure datuek islatzen duten errealitatea. Begirune falta hau, gure taldeari baino gehiago, osasunagatik kezkatutako gizarteari egiten zaio”.

Honela dio hitzez hitz OEITeko osasungintzako profesionalen oharrak:

Asensio jaunak 2018/11/6an ETB1ko Katebegia saioan, gure taldearen kontra egindako deskalifikazioak direla eta, GEIS/OEIT-etik Jose Ignacio Asensio Gipuzkoako Aldundiko Ingurumen eta Obra Hidraulikoen diputatuaren dimisioa exijitzen dugu 

1 – Sendagile talde bat gara. Gizartean dagoen eztabaida gero eta handiagoaren aurrean, 2002tik gure hondar alea ekartzea erabaki genuen, gizarteari informatuz zein harreman dagoen benetan hondakinen erretzea eta osasunaren artean.
2 – Ez gara zientzialariak. Zientzialariak dira guk aurkeztutako ikerketak egin dituztenak. Hor dago gure GEIS/OEITko taldekidea, telebista saio berean datu biribilak aurkeztu zituena. Guk emaitza zientifikoak mahaiganeratzen ditugu besterik gabe, Asensio jaunak behin eta berriz ezkutatzen dituen emaitzak.
3 – Plazaratu ginen aurreneko momentutik, eta gero hamaika aldiz, Asensio jaunari eta momentuko agintariei agertu diegu gure asmo betea dugun informazio guztia emateko. Berak ez du inoiz jakin nahi gure datuek islatzen duten errealitatea. Begirune falta hau, gure taldeari baino gehiago, osasunagatik kezkatutako gizarteari egiten zaio.
4 – Asensio jaunak peskizan ditu guk aurkeztutako ikerketen egileak. Aukera du gonbidatzeko eta galdetzeko, urruneko sendagileekin egin duen bezela (eta zeintzuk interes gatazka nabarmenak dituztenak, bide batez). Guk behin baino gehiago antolatu ditugu mahai inguruak, eta erraustearen aldekoak ez dira agertu.
5 – Inoiz ez dugu inor iraindu, engainatu edo izena belztu. Guk berriz, askotariko irainak, zakarkeriak, arbuioak eta errespetu faltak pairatu ditugu, bakarrik kalitate irizpide kontrastatuak betetzen dituzten ikerketak mahaiganeratzeagatik.
6 – Berriro Asensio jaunaren eskura ezarriko genituzke esandako ikerketak, bere konfiantzako sendagileek miatzeko, baina aurrekari tristeak direla eta, gizartearen adimenari egindako laidoak eta GEIS/OEIT-i jaurtitako kalumniak, bere dimisioa eskatu besterik ez zaigu gelditzen, bidea emateko gizarte bizidun baten kideen ekarpenak aintzat hartzen dituen beste norbaiti, guztion onerako. Bestela exijitzen diogu agiri bat sinatzeko, non bermatzen duena erraustegiak ez duela kalterik ekarriko ondoko biztanleen osasunari, eta azaltzeko zergatik biztanle horiek behar duten jarraipen medikoa.
7 – Denon ongizate horrengatik, eta dauzkagun ebidentziengatik, berriz ardura edo prekauzio printzipioa gogora ekartzen dugu, eta gure arduradunei hondakinen kudeaketa seguruagoa eta osasungarriagoa eskatzen diegu.