Bizkaiak ez du betetzen bere Hondakin Plan Nagusia organikoaren bilketan

Atalak: Bizkaia, Bost kontenedore

Organikoaren bilketa Bizkaian eta Gipuzkoan 2013an. (Irudia: Zero Zabor i.b.e.)

[Pello Zubiria Kamino] Albistearen datu garrantzitsuena Zero Zabor ingurumen babeserako elkarteak (Gipuzkoa Zero Zabor) eman du “Bizkaia, organikoa ezin jasota” albistean: “Bizkaiko Foru Aldundiak helburu bat ipini zuen 2005ean: 2016rako 24.000 tona inguru organiko jasotzea urtean. Hala ere, iaz Bizkaian 5.000 tona hondakin organiko jaso ziren bakarrik. Lortu nahi zenaren bosten bat soilik”. Gipuzkoan egiten denarekin alderatuz gero, kopuru mingarriak dira: 2013ko datuetan (2014koak askotxoz hobeak izanen dira) Gipuzkoak 715.000 biztanlerekin 14.170 tona organiko bildu zituen konpost bihurtzeko (gipuzkoar bakoitzeko 19,8 kilo urtean); Bizkaiak 1.155.000 biztanlerekin 4.900 tona organiko bildu zituen berezirik (bizkaitar bakoitzeko 4,2 kilo).

Larriena da Zero Zabor i.b.e.k salatzen duena ondo dokumentatuta dagoela eta hala ere ez duela sortu ez politikarien eta ez hedabideen (herritarren hain gutxi) erreakziorik: Bizkaiko Foru Aldundia ez da ari betetzen aspaldi erabakitako helburua. “II Plan Integral de Gestión de Residuos Urbanos de Bizkaia 2005-2016” agirian argi eta garbi irakur daiteke zein zen 2004rako helburua hondakin organikoak berezirik biltzeari dagokionez. Zehazkiago, bi helburu posible markatzen zituen, PDF formatuan irakur daitekeen dokumentuan 107. orritik aurrera: pronostikorik baikorrenean Bizkaiak 2004an 24.258 tona organiko bildu behar zituen, ezkorrenean (hondakin guztien kopurua gutxitu ez baina handiagotzekotan) organikotan 27.165 tona bildu behar zituen. Aldiz, 2013an Bizkaia ez da iritsi ezta 5.000 tonen mugara ere.

Europan Gipuzkoako hondakinez behin eta berriro salaketak egiten tematzen den Izaskun Bilbao EAJko parlamentari bizkaitarrak badauka zer kontatua honetaz. Eta EITBk eztabaida mamitsu bat antolatzeko gaia ere bai.