Porlan fabriketan hondakinak erretzen dituzte Katalunian… eta Euskal Herrian

Atalak: Errausketa, Gizarte eragileak, Porlan fabriketan

Herritarrak protestan Kataluniako Moncada i Reixac herrian hondakinak erretzen dituen Lafarge zementu fabrikaren atarian. (Argazkia: Directa)

[Pello Zubiria Kamino] Kataluniako Moncada i Reixac herrian burutu berriak dituzte Porlan fabriketan hondakinak erretzearen kontrako eta Zero Zabor ereduaren aldeko II. jardunaldiak. Euskal Herritik, Sakanako 3 Mugak Batera eta Bizkaiko Lemoa Garbi plataformak izan dira. Hemen ere dagoenekoz zementu fabrikak ari baitira klase guztietako hondakinak erretzen, herritarrak horretaz batere jakin gabe. Horien errausketak gizakien osasunean eta ingurumenean eragiten dituzten kalteak nabarmendu dituzte mundu osotik etorritako adituek Moncada i Reixacen.

Joan den asteburuko biltzarra dela eta, Directa hedabide katalanean Mariana Cantero eta Victor Yustresek “El doble negoci de la incineració a les cimenteres” kronikan azaldu dute zementugileek zertan oinarritzen duten hondakinak erabiltzearen negozioa: “Porlan fabrikek [hondakinak kiskaliz] erregaietan dirua aurrezten dute batetik, eta bestetik CO2 isurien merkatuan bonoak saltzen dituzte, beren etekinen truke gizakien osasuna eta ingurumena arrisku handian jarriz”. Gure artean Mikel Peruarenak xeheki azaldua du kontua “Zeinek erre nahi ditu hondakinak?” liburuan, bereziki “Zementuaren indarra” atalean.

Hauts asko harrotu bazen Olaztiko porlan fabrikaren inguruan, orain arte polemika gutxiagorekin pasatu da Bizkaiko eta Gipuzkoako usinen errausketa. Zehazki Donostiako Añorgako Cementos Rezolan -Zubietako errauskailuaren kokagunetik 5 kilometrora- Eusko Jaurlaritzak 2008an emana daukate honakoak erretzeko baimena: “harinas de carne de origen animal, neumáticos fuera de uso, lodos desecados de tratamiento de aguas residuales urbanas, envases de papel-cartón, envases de madera, absorbentes (filtros de manga), escorias no tratadas, cascarilla de laminación, machos y moldes de fundición sin colada, machos y moldes de fundición con colada, residuos de hormigón y lodos de hormigón, residuos de materiales compuestos a partir de cemento y otras partículas“.

Baimenduetako zerrenda horretako produktuetatik zeinetatik zenbat ari ote dira erretzen 2015an bertan Gipuzkoa eta Bizkaiko porlan fabriketan?