Añorgako Rezola: Donostiak jada martxan daukan erraustegi ezezaguna

Atalak: Dokumentuak, Errausketa, Eusko Jaurlaritza, Porlan fabriketan

[Pello Zubiria Kamino] Aste honetako ARGIA astekariaren azalean “Donostia, errausketaren hiriburu?” irakurririk harrituko zen irakurle asko. Orobat 5 eta 10 kilometroko inguruneak markatzen dituzten bi puntu gorri ikusita, bata Gipuzkoako Foru Aldundiak erraustegia egin nahi duen Zubietan eta bestea Añorga auzoan. Gutxi baitira Donostialdeko herritarrak jabetu direnak honez gero hondakin industrialak erretzen dituztela Rezola zementu fabrikan, Zubietako “zero gunetik” bost kilometrora. Kilometro eta erdira dauzka: Poliklinika, Onkologikoa, Donostialdeko hiru ospitaleak, EITBren egoitza eta Batzar Nagusiak. Hernaniko eta Lasarteko udalak 2,6 kilometrora.

ARGIAren harpidedunek etxeetan gaur eta bihar jasoko duten zenbakiak azaltzen denez, Eusko Jaurlaritzak 2008an hondakinok erretzeko Rezolari emandako Ingurumen Baimena zabaldu egin zion 2015eko urtarrilean, tartean  hondakinen errausketak eragindako dioxina, furano, metal astun, HF eta beste kutsagarrien kontrolak arinduz.

Hiru hondakin multzo kiskaltzeko baimena dauka Rezolak Añorgan. Hirugarren multzoan espreski aipatzen da hondakin toxikoak erretzea onartu diola Eusko Jaurlaritzak, baimenaren agiri ofizialak dakarren grafiko honek erakusten duenez:

Ondoko egunetan ARGIAk Interneten jarriko du 2015eko baimen berrituaren kopia bat osorik.

Añorgako Cementos Rezola porlan fabrika. (Argazkia: Mapio)