Larunbatean Andoainen osasunaren alde eta errausketaren kontrako martxa

Atalak: Ekitaldia, Errausketa, Gizarte eragileak, Osasuna

[Pello Zubiria Kamino] Larunbatean, martxoak 12, hondakinen errausketak herritarren osasunari dakarzkion kalteak salatzeko manifestaldia antolatu da Andoainen. Herriko Ipar Haizea plataformak antolatuta, Gipuzkoa osoko ia ziento erdi eragilek egin dute protestan parte hartzeko deia. Etxeberrieta plazatik abiatuko da arratsaldeko 17:00etan.

Antolatzaileek martxarako egindako deialdian herritarrei oroitarazi dizkiete errausketak jendeen osasunari egiten dizkieten kalteak, berrikitan OEIT Osasuna eta Errausketa Ikerketa Taldeak salatu zituenak eta Andoainen bertan joan den abenduan Eduard Rodriguez Farré mediku eta adituak jende aurrean azaldu zituenak.

Ipar Haizea plataformak Andoaingo herritarrei nabarmendu die herria Zubietan Gipuzkoako Foru Aldundiak eraiki nahi duen erraustegitik hiru kilometrora geratzen dela eta, gainera, hortik oso hurbil Añorgan porlan fabrikan 2008tik ari direla hondakin gehiago erretzen.

Hain zuzen ere Osasuna eta Errausketa Ikerketa Taldeko medikuek Donostian hitzaldia eskainiko dute astelehenean, martxoak 14. Koldo Mitxelena aretoan 19:00etatik aurrera “Errauste plantek pertsonen osasunean eragiten duten arriskuaz” ariko dira OEITko bost doktore: Maialen Berridi, Juan Cruz Villandiego, Jose Luis Paulin, Xabier Mitxelena eta Marta Barandiaran.