280 herritarrek azalpenak eskatu dizkiote Pasaiako Udalari erraustegia kostako zaienaz

Atalak: Errausketa, Gizarte eragileak, Zorra

Pasaiko herritarrak ekimenaren berri hedabideei ematen.

[Pello Zubiria Kamino] Pasaitar multzo handi batek –280k, Hitzaren arabera– idatzia aurkeztu du udalean alkateari kontuak eskatuz Zubietako erraustegiarekin herritarrei gaineratuko zaien zorraz: “Herritarrok isilean gordetzen dituzten erabakiak eta haien ondorioak ezagutzeko eskubidea dugu, are gehiago, 35 urterako hipotekatuko gaituztela jakinda”.

Gogorarazi ostean aurreko legealdian Atez Atekoa herrira egokituta Pasaiak %76ko birziklatze tasak lortu zituela, deitoratzen dute EAJ eta PSEk bost edukiontzien sistemarekin nola %58raino apaldu dituzten gaikako bilketa tasak herrian: “Errausketaren Aurkako Mugimenduak zabaldutako informazioa kezka handiz jaso dugu Pasaiako herritar ugarik. Informazio horren arabera, Gipuzkoako Foru Aldundiak eta GHK-k Gipuzkoako udal guztiak 2051. urtera arte zorpetuta utziko dituzten erabakiak hartu dituzte. Hondakinekin dagoen arazoa aitzakia hartuta, haien helburua milioika euro kostako den azpiegitura eraikitzea da, nork bere etxe ondoan inork nahi ez duen errauskailua, alegia. Eraikuntza-lana eta kudeaketa pribatuak izango direnez, etekin ekonomikoa bermatu beharrekoa da. Errauskailu hori eraikitzeko Gipuzkoako herriei baldintza onartezinak ezarriko dizkiete, eta herritarrok gure poltsikotik eta gure osasunarekin ordainduko dugu datozen 35 urteetan. Agintariek administrazio kontseiluetako euren lagunekin ezkutuan hartu dituzte erabakiak, herritarron bizkar”.

ARGIAk azaldua duenez, Gipuzkoako hainbat herritan aurkeztu dira galderak udal agintariei eskatuz informazioa eta eztabaida publikoa erraustegiak ekarriko dien zorraren inguruan. Pasaian batek ez, 280 herritarrek eskatu dizkiote kontuak alkateari.

Pasaiako herritarrek udalean aurkeztutako idatzia:

Errausketaren Aurkako Mugimenduak zabaldutako informazioa kezka handiz jaso dugu Pasaiako herritar ugarik. Informazio horren arabera, Gipuzkoako Foru Aldundiak eta GHK-k Gipuzkoako udal guztiak 2051. urtera arte zorpetuta utziko dituzten erabakiak hartu dituzte. Hondakinekin dagoen arazoa aitzakia hartuta, haien helburua milioika euro kostako den azpiegitura eraikitzea da, nork bere etxe ondoan inork nahi ez duen errauskailua, alegia. Eraikuntza-lana eta kudeaketa pribatua izango denez, etekin ekonomikoa bermatu beharrekoa da. Errauskailu hori eraikitzeko Gipuzkoako herriei baldintza onartezinak ezarriko dizkiete, eta herritarrok gure poltsikotik eta gure osasunarekin ordainduko dugu datozen 35 urteetan. Agintariek administrazio kontseiluetako euren lagunekin ezkutuan hartu dituzte erabakiak, herritarron bizkar.

PNVk eta PSOEk behin eta berriro diote hondakinen arazoaren konponbidea beren lagunak aberastuko dituen errauskailua dela, ez baita zabortegi gehiagorik egongo. Gezurra gezurraren atzetik. Noiztik da soluzioa lehengaiak erretzea? Non geratzen da Europak ezarritako hierarkia? Eta birziklapena? Non utziko dituzte errausketaren ondorioz sortzen diren errauts toxikoak? Bizkaian zaborra erretzen dute, eta errautsak tratatu gabe zabortegira botatzen dituzte. Birziklapen tasa negargarria dute, gainera.

Gai honetan Pasaiako Udalaren jokabidea erabat arduragabea da. Gobernua osatzen duten PNVk eta PSOEk alkatetza eskuratzeko hondakinen gaia erabili zuten. Behin eserlekua lortuta, soldatak igo, eta hondakinen kudeaketaren gaian utzikeria eta erantzukizun eza gailendu dira. Moldatutako atez ateko bilketa sistemarekin eta orain gobernuan daudenen boikot aktiboarekin gaikako hondakinen bilketa tasa %76ra iritsi zen. Udalak bilketaren kontrola izanda, lehengaiak salduz, diru iturri bat zuen, eta errefusa tratatzeagatik gastua baxua zen. Urtebetean PNVk eta PSOEk hondakin bilketa pribatizatu dute diru sarrerak ere pribatizatuz, eta bilketa hori %58 ingurura jaistea lortu dute. Errefusa gehitzean, udalak, eta ondorioz herritarrek, ordaindu beharreko dirua biderkatu du. Iragarritako kontzientziazio kanpainak ez dira burutu, eta guztiaren soluzioa izatekoa zen borondatezko 5. edukiontziaren opari pozoitsuak kutsatzeko eskubidea besterik ez du gauzatu. Gizalegez, hondakinak murriztu eta sailkatzen ditugun herritarrok zigortu egiten gaitu udal honek. Errauskailua ordaintzeko pasaitarrok urtero milioi erdi euro ordaindu beharko ditugu 2051 bitartean. Eta hau guztia errauskailuek osasunean sortzen dituzten arazoak aipatu gabe.

Hori dela eta, eta udal gobernuak herritarrekiko duen begirune ezaren aurrean, Pasaiako alkate Izaskun Gomez Cermeñori gai honen inguruan informazioa helarazteko eskatu diogu. Herritarrok isilean gordetzen dituzten erabakiak eta haien ondorioak ezagutzeko eskubidea dugu, are gehiago, 35 urterako hipotekatuko gaituztela jakinda.

Gure kontura egin nahi duten negozio horrek badu baina alternatibarik: hondakinak murriztu, gaikako bilketa eraginkorra ezarri eta birziklatu. Garatzen den errefus eskasa inertizatu eta gorde. Alternatiba merkeagoa, osasuntsuagoa eta jasangarriagoa. Gipuzkoan %80ko bilketa selektibora iritsi diren herriak badaude. Pasaitarrok azken urte eta erdiko bide okerra utzi, eta haien bidea har dezakegu. Guztiok arduraz jokatzen badugu, herritarron %99ren ekonomia eta %100en osasuna ez da kaltetuagoa izango.