Errausketaren Aurkako Mugimenduak “Gaixotu nahi ez dutenen martxa” deitu du Donostiako Aste Nagusian

Atalak: Ekitaldia, Errausketa, Gizarte eragileak

Abuztuaren 16an, azteazkena, 19:00etan Sarriegi plazatik abiatuta, “Gaixotu nahi ez dutenen martxa” izaneko performania  [performance+manifestazioa] eginen da Donostiako Aste Nagusiaren baitan, Errausketaren Aurkako Mugimenduak Aingura kofradiarekin elkarlanean deiturik. Donostiako lurretan Zubietan eraikitzen hasi diren erraustegia salatuko dute bertan.

EAMeko antolatzaileek deialdian aurreratu dutenez, 240 boluntariotik gora ariko dira performania arrakastatsua izan dadin lanean, eta hurbilduko diren herritarrei eskatu diete kutsaduraren kontra mozorrotzeko prest azaltzea. Erraustegiaz  bertako zein kanpoko herritarrei laburki azaltzeko esku-orri bat ere plazaratu dute hainbat hizkuntzatan.

Hitzez hitz honela dio antolatzaileen agiriak:

Nahiko gaixotua , kutsatua eta sostengagaitzezko bidean badugu gure amalurra, non are gehiago gaixotu nahi gaituzte beharrezkoa ez den eta osasunarentzat oso kaltegarria den Zubietako erraustegia bezalako infraestruktura handi hau  inposatuaz.

Gutxi batzuen negozio eta etekin ekonomiko asegaitzaren nahia eta kontsumismo eta baliabide materialen xahuketan oinarritutako ekonomia eredua dira arduradun nagusiak.

Errausketak minbizia eta beste gaixotasun asko sortzen ditu eta ura , nekazaritzako lurra eta abeltzaintza kutsatzen du etorkizuneko belaunaldiak hipotekatuaz.

Ikerketa epidemiologiko eta osasunaren ezagutzarako ariketak esanguratsuak egin dira  Ingalaterran, EEBBetan, Quebequen, Italian eta Espainian belaunaldi berriko erraustegietan eta  jasotako datuak zuhurtziaren printzipioa aplikatzera deitzen dute hondakinen kudeaketaren  inguruko legeriak azaltzen duen bezala, populazioaren osasuna ez baita arriskuan jarri behar.

Zertara datozte  orain Diputazioko gobernari errauszaleek erraustegiaren obrak martxan jarri berri duten momentu honetan  544.000 euroko partida erabiliaz Biodonostia medikuntza ikerketarako institutua kontratatuaz ?

Esaten digute ingurugiro jasangarritasunean eta osasun publikoan parametro esijenteenak bermatuko direla baina Zientziaren prestigioa manipulatzen ari dira erraustegiaren  gezur handia  sostengatzeko. Hau fartsa operazio  berri bat da, osasunaren inguruko marketin faltsua . Orain arte egin diren eta publikoki azaldu diren  ikerketa epidemiologikoen minbizi eta gaixotasunen diagnostikoak eta heriotzak ez al dira datu ofizialak ?

Errauszaleek 240 bolondres eskatzen dute fartsa honetan parte hartzeko . Zera adierazi behar  diegu gobernari errauszale gezurti hauei , gurekin jai daukatela horrelako fartsa operazio  batean parte hartzeko .

Bestalde erraustegiaren 2.fasea onartu da, oraindik kontratua eskatu bezala publikoki egin ez dutenean. Zer da ba ezkutatzen dutena? Ez dugu 2.fase hau ere onartzen. Egunotan Zubieta eta Usurbilgo lurretan gasa sartzeko obretan ari dira Usurbilgo Udalak baimenik eman gabe eta bizilagunei bizimodua aztoratuz. Baina gasa zertarako? Gasa behar al da? Hori dirutza!!! Hala da bai, beti esan dugun bezala zaborrak ez du nahiko indar kalorifiko erretzeko eta gasa behar du.

Gu herritarrei eskatu nahi dieguna zera da , zentzu kritikoa erabiltzea eta mobilizaziorako deia berrestea. Ez dugu gaixotu nahi .Behin betiko gelditu nahi dugu erraustegiaren egitasmoa. Lurra eta herria bizirik nahi ditugu. Etorri zaitez abuztuak 16 Donostiako Sarriegi plazara (19:00) eta parte hartu zazu mozorrotua performanian. Han aurkituko gaituzte 240 bolondres baino gehiago, osasuna eta gure boltsikuen alde ordea!!! Errausketarik ez !

Errausketaren Aurkako Mugimendua