Valentziako Erkidegoa polan-fabriketan hondakinik ez erretzeko urratsak ematen hasi da

Atalak: Errausketa, Estatu espainiarrean

Errausketaren aurkako protesta Bunyoleko porlandegiaren atarian 2017ko urtarrilean. (Argazkia: Diari La Veu)

Julià Alvaro Valentziako Generalitateko Ingurumen sailburuak iragarri du Bunyol herriko porlan-fabrikak berehala utziko diola hondakin toxiko eta arriskutsuak erretzeari eta ondoren edozein motatako hondakinen errausketa geldituko duela.

Berdeak-Equo alderdiko kidea den Alvarok bere blogean iragarri ditu urratsok, gero publiko zabalago bati Valencia Plaza hedabideak zabaldu dizkionak. Generalitatera Ximo Puig eraman zuen koalizio gobernuak bere programan dauka argi ezarria herrialdean hondakinen errausketa eten eta aurrerantzean bestelako kudeaketak sustatzea.

Bunyolen une honetan hondakin toxiko eta arriskutsuak erregaitzat erabiltzen ari da Cemex konpainiaren zementu-fabrika. Eta bestelako hondakinak erretzen ditu, Cemexekoak bezala, Lafargek Sagunten daukan porlan-fabrikak. Julià Alvarok aurreratu dituen debekuek bien jardueran izango dute eragina.

Gogoratu Euskal Herrian klase guztietako hondakinak, toxiko eta arriskutsuak barne, erretzeko baimena daukatela Gipuzkoan Donostiako Rezolak eta Bizkaian Arrigorriagako Rezolak eta Lemoako Lemonak.