Espainiako estatuko Errausketaren aurkako mugimenduek biltzarra egingo dute El Bierzon asteburuan

Datorren asteburuan, urriaren 12tik 14a artean, Bierzo Aire Limpio elkarteak antolatuta, Leongo Ponferrada hirian beren zortzigarren biltzarra burutuko dute Espainiako estatuan hondakinen errausketaren aurka borrokatzen diren elkarteek. Tartean Euskal Herriko ordezkaritza ere izanen da. Amantes de las Basuras elkarteak ere hor ospatuko du bere 24. bilera nagusia.

Goiburu nagusia “Aire garbi baten alde” daramaten jardunaldiotan hondakinen kudeaketaren inguruko hainbat osagai aztertu eta eztabaidatuko dira: errausketa eta osasunean dakartzan kalteak, biho-hondakinak, ekonomia zirkularra, zero zabor eredua, garapen eredua…

Antolatzaileek aurreratu dute sare sozialetatik streaming bidez zuzenean eskainiko dituztela hitzaldi guztiak eta horiek jarraitzeko beren komunikazioetan honako traolak erabiliko dituztela: #IncinerarMata, #AireLimpio eta #ResiduoCero. Estuki daude lotuta Zero Waste mugimenduaren lider ezagunena den Paul Connett iparramerikarrak Ponferradako jardunaldien itxieran emango duen hitzaldiaren izenburuarekin: “Zero Zabor: hondakinik gabeko etorkizuna”.

Aztergaien artean, zerrenda aberatsa iragartzen da: “Ingurumenari lotutako gatazka eta delituak”, “Zero Zabor eta hiri hondakinen kudeaketa iraunkorra”, “Lurraldearen kudeaketa kolektiboa eta alternatiba ekonomikoak”, “Hondakinen errausketa: arriskuak eta alternatibak”.

Ponferradako jardunaldien antolaketan, Bierzo Aire Limpio eta Leongo hainbat elkarte eta plataformaz gain, parte hartzen ari dira Lurraren Lagunak, Ekologistak Martxan eta GAIA Errausketaren Aurkako Munguko Koordinadora. Euskal Herritik iritsitako hitzaldi bat ere iragartzen du egitarauak: Mattin Aldaia Hernaniko Ingurumen zinegotziak aurkeztuko du “Hondakinen kudeaketaren hobetzea: Hernaniko esperientzia”.