Zubietako errauste planta bi kilometrora baino gertuago izango dute 25.000 lagunek

Atalak: Errausketa, Gipuzkoa, Zubieta

Herri plataformek manifestaziorako deia egin dute, hilaren 14an, Usurbilen
BERRIA. I. Petxarroman. Zubieta

Zubietanegin nahi duten errauste planta bi kilometrora baino hurbilago izango dute Usurbil, Lasarte-Oria eta Zubietako 25.000 bizilagunek. Zubieta Lantzen, Usurbil Bizirik eta Lasarte-Oria Bizirik herri  plataformek gogor salatu zituzten agintari eta arduradun politikoak, herritar guztien gainetik, «kosta ahala kosta», errauste planta egin nahi dutelako. «Tamalez, gure politikariek etika eta lotsa, biak galdu dituzte», kexatu zen Alaitz Aizpurua bozeramailea, hiru herri plataformen izenean.

Usurbil, Lasarte-Oria eta Zubietako herri plataformek beste mobilizazio bat egiteko deia egin zieten Gipuzkoako herritar guztiei. Errausketa ez da bidea. Erraustegirik ez, ez hemen ez inon manifestazioa abiatuko da Usurbilgo plazatik, eguerdiko 12:00etan. Aurretik irtengo dira jende multzoak Lasarte-Oriatik eta Donostiako Ibaetatik (10:30etan); Zubieta eta Añorgatik (11:00etan); eta Usurbilgo Santuenea auzotik (11:30etan). Ordua zehaztu ez bazuten ere, Igeldotik ere talde bat irtengo dela esan
zuten.

«Herritarrei bizkarra emanez» jardutea leporatu zieten Foru Aldundiko, mankomunitateetako eta udaletako politikariei. Herriaren mobilizazioak aintzat ez hartzea eta jendea «inozotzat» jotzea aurpegiratu zieten arduradun politikoei, eta ziurtatu zuten Zubietako kokagune berriak ez duela indarrean den legedia betetzen, milaka herritar dituelako bi kilometrora baino hurbilago. Esaterako,
Landaberri ikastola, Zubietako lanbide eskola eta Zubietako eskola txikia 800 metro ingurura izango dituela gogoratu zuen Aizpuruak.

Kokapena erabakitzerakoan, «berriz ere irizpide politikoak» erabili izana leporatu zieten ordezkari politikoei, eta arduradunak asko badira ere, Zubietako Herri Batzarreko alkate Imanol Azpirozek Odon Elorza Donostiako alkatea egin zuen arduradun nagusi, hiri horretako zaborren kudeaketaren ardura berea delako.

Azpirozek animoa azaldu nahi izan zien errauste plantaren aurka dauden guztiei, haren iritziz, «aukera handiak» daudelako proiektua bertan behera geratzeko. Berriki Donostiako Udal Gobernuak hartutako erabakiak –errauste planta Zubietan kokatzeari argi berdea eman zionak– oinarri juridikorik ez duela adierazi zuen. Ildo horretan, epaitegietara joko dutela ziurtatu zuen. Dagoeneko, Gipuzkoako Foru Aldundiaren aurka jo dutela nabarmendu zuen. Izan ere, errekurtsoa jarri diote Aldundiak, Urolako
Mankomunitatearekin batera, Lapatxen egitea aurreikusten duen konpostatze plantaren proiektuari. «Ez konpostatzearen aurka gaudelako, zeren eta alde gaude, baizik eta gauzak egiteko moduaren aurka
gaudelako».

Plataformek salatu zuten zaborren kudeaketari buruz hitz egiteari uko egiten diotela politikariek, «hala eginez gero, nabarmen ikusten baita erraustea ez dela bidezkoa». Halaber, ziurtatu zuten Gipuzkoan posible dela zaborrak kudeatzea erraustu gabe, eta jendearen parte-hartzea eskatu zuten horretarako: «Zaborra gutxitu eta sailkatu behar da etxeetan. Udalak, berriz, legez behartuta daude bereizitako zaborra gaika jasotzera. Hori da abiapuntua, errauste planta jarri nahi dutenek hartu nahi ez duten erabakia».

DONOSTIAKO UDAL BATZARRA. Bestetik, plataformek dei egin zioten Odon Elorzari, errauste plantaren kokalekua erabakitzeko udal batzarra egiten duenean, ateak zabalik utz ditzala herritarrak sar daitezen, hala, istilurik ez delako izango. Izan ere, Landarbasoko kokalekua erabaki zuten 2006ko
ekaineko udalbatzan istiluak izan ziren.