Gipuzkoako aurrekontuen negoziaketen erdian, Zubietako errauste planta

Atalak: Aldundiak, Batzar Nagusiak, Errausketa, Gipuzkoa, Politikariak

Gipuzkoako Foru Aldundiaren 2013rako aurrekontuen negoziaketetan mugimendu nabarmenak ari dira gertatzen azken hamabost egunotan. Duela astebete EAJk iragarri zuen Martin Garitanoren gobernuari ez ziola osoko zuzenketarik aurkeztuko, ordu gutxiren bueltan proposatzeko Zubietako errauskailuaren obrak berehala hasteko emendakin bat: 17 milioi euro, Diputazioak Partzuergoari ematen dion dirua zehazki errauste plantari loturik egotea.

Egun gutxiren bueltan jakin da PSEk deusezean utzi duela Bilduren aurrekontuei ezarritako osoko zuzenketa ere. Horiek horrela, PP da Bilduri ezezko borobila ematen dion bakarra. Gainera, gaur egunkariek diotenez PSEren eta Bilduren arteko negoziaketa oso aurrera iritsia zen, antza denez Zubietako errauste plantagatik eten den arte. Zergatik?

Hedabide guztietan azaldu da Martin Garitanok EAJri egotzi diola kanpotik PSErekiko akordioa lehertzen saiatu izana. Nola? Berrian Jokin Sagarzazuk honela laburbildu du EAJk egindako mugimendua: “Hasieran, EAJk gai berari buruzko zuzenketa bat aurkeztu zuen, baina atzera egin behar izan zuen, beste taldeen babesa jasoko ez zuelako. Izan ere, 17 milioi euro errauste plantara «bakarrik» bideratzeko eskatu zuen. Proposamen hori Gipuzkoako hondakinen kudeaketa planarekin bat ez duelako egiten, ostiralean, beste zuzenketa bat adostu eta aurkeztu zuen PPrekin batera. Zuzenketa horretan, eskatzen dute 17 milioi horiek errauste plantarako eta tarteko beste azpiegitura batzuetarako —konpostatze eta transferentzia plantak egiteko, besteak beste— bideratzeko. Planteamendu hori bat dator PSE-EEk orain arte defendatu duenarekin, eta, beraz, ezingo luke ezezkorik esan, alderdi sozialistako iturriek diotenez.”

Bateko eta besteko kronikak leiturik, Bildu eta PSE aurrekontuetan adostasunera iristeko bidea itxita dago. Aldiz, atalkako zuzenketetan jokatuko dira erabaki garrantzitsu asko. Oren buru, une honetan: Bilduk aurreratuta dauka PSErekin krisiaren kontrako estrategiaren inguruko adostasuna; EAJk PPrekin lotu du Zubietako errauskailuaren defentsa; Bilduk eta PSEk aurkitzeke daukate hondakinen inguruko adostasun posiblea (errauskailutik eta gaur polemikaren erdian dauden bilketa sistema zehatzetatik haratago joan beharko duena)… eta Gipuzkoako aurrekontuen inguruko negoziaketek aurrera diraute sekula baino panorama irekiagoan.

Berria “EAJk «oztopatu» du Bilduren eta PSE-EEren arteko akordioa”

Gara “El PSE despeja aún más el camino a los presupuestos de Gipuzkoa”

Diario Vasco “La Diputación tiene el camino abierto para aprobar el presupuesto del 2013”

Noticias de Gipuzkoa “El apoyo a la incineradora frena el acuerdo presupuestario entre el PSE y la Diputación“