Plastikozko zorro eta ontzien egia ezkutuak

Atalak: Aurkezpenak, Berdiseinatu, Berrerabilpena, Europa, Gizarte eragileak, Prebentzioa

Zero Waste Europe koordinakundeak aipamen berezia egin berri dio OnlineEducation.net guneak gazteentzako prestatu duen Our Plastic Nightmare (Plastikozko gure amesgaiztoa) azalpen grafikoari. Izan ere, ez al da amesgaiztoa behin baizik usatuko ez dugun litro bat ur ekarriko ditugun plastikozko botila hori egiteko lanean xahutu izana litro laurden bat petrolio eta hiru litro ur?

Plastikoak azaleratzen du gure gizarteak bizi dituen kontraesanen arteko handienetako bat. Alde batetik gai sendo, merke eta arina delako egokia da edonon eta ia edozertarako usatzeko. Beste aldetik, abantaila horietan bertan dauka plastikoak arazo nagusia.

Hain merkea izanik, behar baino askoz errezago eskuratzen da, arina delako sarritan hortik zehar uzten da eta ustelgaitza izateagatik kutsatzen ditu oihan, ibai eta itsasoak, dagoenekoz elikadura katean sartu delarik.

Burutsuena da plastikoa behar denerako baizik ez usatzea eta segurtatzea merkatura iristen den plastiko oro ahalik eta luzeen usatu eta azkenean txukun bildu eta birziklatuko dela. Adierazgarria da nola litro bat ur edateko behar den tarte laburrean baizik erabiliko ez dugun plastikozko botila egiteko gastatu behar izan diren litro laurden olio eta hiru litro ur.

Diseinuaren ikuspegitik ez da ulergarria desegiteko ehunka urte beharko dituen materiala usatzea minutu edo ordu bakan batzuetan kontsumitzeko. Horren aurrean egokiena da suntsiezina den gai hau bildu eta berrerabiltzeko sistema antolatzea, Europako leku anitzetan egiten den moduan.

Baina 2009an Europak lurperatu egin zuen bere plastiko usatuen %45 (11,2 milioi tona, 10 milioi tona petrolio adina), erre egin zuen %22 (5,5 milioi tona) eta birziklatu %31 (7,6 milioi tona) besterik ez. Grafikoetan ikus dezakegunez, botila bat plastikoa birziklatuz egiteko ez da behar osorik berria egiteko behar den energiaren %12 baino.

Europar Batasuneko Ingurumen komisario Janez Potocnikek azaldu duenez, Europak birziklatzen duenean  usatutako plastikoetatik %70, sotuko ditu 160.000 lanpostu berri. Bestalde, Europako Batzordearen agiri batek erakutsi du Europar Batasunak Asiara birziklatzeko esportatzen duen plastikoa bostez biderkatu dela azken hamar urteotan.

Ez al da garaia Europako Batasuna has dadin diseinatzen plastiko hobeak, toxiko gutxiago daramatenak, produktu hobeak eta horien tratamendurako sistema hobeak, baimenduko digutenak plastikoaren abantailak erabiltzea horren kalteak nozitu gabe?

Zero Waste Europe “Fantastic plastic”