Antxon Olabek proposatutako kontsentsu berria

Atalak: Sailkatugabeak

Ingurumen ekonomialaria eta Neider enpresako kidea den Antxon Olabek El Pais egunkarian argitaratu du Residuos en Gipuzkoa: sensatez y consenso artikulua. Olabe egunkari horretako kolaboratzaile ezagunaren izena 2009an aipatu zen Patxi Lopezen jaurlaritzan sailburuorde izan zitezkeenen artean. Gipuzkoan hondakinen eztabaidan ondoko asteetan egon daitezkeen puntu batzuk zehazten ditu, PSEko edo inguruko zenbait aditu eta politikariren artean pentsatzen ari direnak agian, hemen laburbiltzen ditugunak:

– Erraustea ahaztu behar da. Duela 15-20 urte errauskailu berriek aurrerapena ekarri zuten aurreko labe desastrosoen aldean. Baina orain errauskailuok inbertsio handiak eskatzen dituzte, horiek egiteko administrazioak eskuak lotuta geratzen dira urte askorako eta ondorioz errauskailuaren errentabilitate beharrarekin topo egiten du birziklapenak: ezin dute %30-35etik gora egin. Horregatik Espainian ere atzera botatzen ari dituzte errauskailu proiektu batzuk.

– Atez Atekoaren kontrako 70.000 sinadurek garbiki adierazten dute inposizioak ezin duela funtzionatu. Burugabekeria izan da hamarkada luzez autoritarioa izan den mugimendu politiko batek gehiengo soziala ez daukan herrietan Atez Atekoa ezarri nahia.

– Herri txikietan Olaberi ondo iruditzen zaio auzokonpostaren eta autokonpostaren bidez kudeatzea hondakin organikoa.

– Gainerako Gipuzkoan organikoa edukiontzi bidez biltzeko ahalegin handi bat proposatzen du, orain arte entzun ez den ñabardura honekin: “En el resto del territorio histórico, la apuesta habría de ser por una recogida selectiva de la materia orgánica mediante contenedor que tras un proceso de aprendizaje, implantación y desarrollo de entre uno o dos años de duración, pasase a ser obligatorio por medio de las correspondientes ordenanzas municipales“. Beraz, urte bat edo biko ikasketa prozesua, ondoren organikoaren bilketa derrigortzeko.

– Egoki jotzen du -testu osoan zehar ulertzen da Diputazioaren planaz ari dela- hondakinak kudeatu eta tratatzeko proposatzen den eredu deszentralizatua, Gipuzkoaren izaeragatik eta inbertsioak bezala lanpostuak eskualdeka banatzen dituelako.

– Energi efizientziazko eta energia berriztagarriak garatzeko irizpideak lotu beharko litzaizkioke Gipuzkoako hondakinak kudeatzeko planari.