Bilboko tratamendu biologiko-mekanikorako plantak zaborren arazoa handitzen duela dio Eguzkik

Atalak: Sailkatugabeak

Jose Luis Bilbao Bizkaiko ahaldun nagusia eta Iñaki Azkuna Bilboko alkatea, Tratamendu plantaren inaugurazioan (Argazkia: Bizkaiko Foru Aldundia)

Bizkaiko Foru Aldundiak Bilboko Arraiz mendian zabaldu duen Tratamendu Mekaniko Biologikorako Plantak zaborren arazoari ez diola konponbiderik emango salatu du Eguzki taldeak. Aitzitik, arazoa handitu besterik ez duela egingo esan du.

“Azken hamar urteetan bizkaitarren zaborrak hiru lekutara joan dira: herena zabortegietara; herena errauskailura; eta beste herena birziklatzera”, azaldu du Eguzkik.

“Orain, Diputazioak zentro hau zabaldu du. Zabortegietara botatzen ditugun hondakinak planta horretara eramango dituzte. Horietatik %8 inguru birziklatu egingo dute. Beste guztia lehortzen ahaleginduko dira, eta behin lehortuta, errauskailura eramango dute gehiena, erretzera. Aurrerantzean, zaborren patua izango da: %40 inguru birziklatu egingo da, eta %60 erre”.

Bost arrazoi eman ditu Eguzkik zaborren arazoa handitu egingo dela azaltzeko. Hona laburtuta:

Errekurtsoak erretzeak badu zentzurik?

Bizkaitarrek hondakinen %38 bakarrik birziklatzen dugu. Beste guztia erretzera edo zabortegira bidaltzen dugu. Botatzen ditugun hondakin horietatik, gehienak birziklagarriak dira. (…) Errekurtso mugatuak dituen planeta honetan, errekurtsoak erretzen ibiltzea ez da oso zentzuduna.

Gainera, birziklatzen ez dugun bakoitzean dirua galtzen dugu. (…) Aberastu den bakarra, errauskailuaren jabea. Esan beharrik ez dago, errauskailua eraikitzeko erabili zen diru publikoa ere geure poltsikoetatik atera zela.

Errauskailuek minbizia sortzen dute

Gure zaborrak erretzera eramaten dituen kamioiak botatako keak nahikoa ez, eta errauskailuak botatako toxinek minbizia sortzen dute inguruetan bizi diren herritarrengan. Ez diogu guk, Carlos IIIa unibertsitateko ikerlariek baieztatu dute orain dela gutxi.

Zer egin errauts toxikoekin?

Errauskailura sartzen den zabor bolumenaren %20 izaten dira errautsak. Kopuru oso handia. Horregatik ari dira proposatzen errauts horiek errepideak egiteko erabiltzea. Nork nahi du bere etxe alboko errepidea erretako zaborrek sortutako errauts toxikoekin egitea?  (…) Argi dagoena da errauskailuek ez dutela zaborren arazoa konpontzen. Alderantziz, arazoa konplikatu besterik ez dute egiten, zaborrak errauts toxiko bihurtzen dituztelako.

Birziklatzeari beldurra

Bizkaiko Foru Aldundiak beldur handia dio birziklatzeari. Zergatik? Bizkaitarrek gehiago birziklatzen badute errauskailuak jateko gutxiago edukiko duelako. Eta errauskailuak jateko asko behar du, errentagarria izateko. Erretzeko zaborrik barik, ez dago negoziorik!

Alternatibak badaude

Zaborren gurpil zoro honetatik atera behar gara bizkaitarrak. Zaborrak erre ordez, hondakinak birziklatu behar ditugu. Inguruko herrietan dauzkagu adibideak. Hondakinen %80 birziklatzen ari dira Euskal Herriko hainbat txokotan. Baita Katalunian edota munduko beste leku askotan ere. Sistema asko eta onak daude hori lortzeko: autokonposta, auzokonposta, atez ateko bilketak…