Bilduk hondakinez azaldu duen jarrera berria analizatu du Petxarromanek

Atalak: Iritziak / Adierazpenak, Politikariak

Besteren artean Lurra zorua bailitzan eta Su haietatik ke hauek liburuen egile den Iñaki Petxarroman Berriako kazetariak “Ontzia, nora ezean” artikulu gordinean analizatu du  azken asteotan Gipuzkoako Bildu koalizioak hondakinen kudeaketaren aldaketarako bidean azaldu duen jarrera.

Petxarromanen iritzian “belak jaso eta ekaitza pasatu arte itxarotea erabaki du Bilduk hondakinen auzian”, ez orain artean Gipuzkoako bere 34 alkatek publikoki sustatutako Atez Atekoa txarra delako baizik “gaia sortzen ari den burrunba politiko-mediatikoa baretzeko” asmoz. Azaldutako jarrera berriak lasaitu dituen arren Zarautz, Arrasate edo Azpeitiako alkateak (zehazki hiru horiek nabarmendu ditu analisiak), Bilduk aldaketa ondo esplikatu ez duela uste du Petxarromanek: “Nola azaldu norabide aldaketa, itsas gogorraren aurka, atez ateko sistemarekin aurrera egitea erabaki duten udal agintariei? Zein izango da neurgailua erabakitzeko non ezarri behar den sistema eta non ez? Zeren arabera egin behar da atzera Legazpin eta Ormaiztegin eta aurrera Lezon eta Villabonan? Ezkutuko akordioren bat lortu al du Bilduk EAJ edo PSE-EErekin jarrera aldaketa horren truke? Galdera asko sortu dira eta erantzun gutxi”.

Funtsean gatazka honetan eztabaidatzen dena hondakinak gaika sailkaturik biltzeko derrigortasuna dela uste du Petxarromanek, eta horri heldu beste erremediorik ez dutela izango politikariek. Ohar zorrotz hau ere luzatzen die hondakinen Gipuzkoako gatazka sakonean ezagutzen duen kazetariak Bilduko agintariei: “Ataka estu batean lemari adorez eusten ez bazaio —Hernanin egin zuten bezala, adibidez— Gipuzkoa ez da gehiegi urrunduko egungo birziklatze tasetatik (%35), eta errauste planta ezarri nahi duten alderdiak lehia irabaztetik gertu egongo dira”.

Lehenago, apirilaren 30ean, Elgeta eta Zumaiako udaletan onartutako akordioen inguruan Berrian “Tarteko bidean, txipak itsumutil” analisia plazaratua du Zeinek erre nahi ditu hondakinak? liburuaren egile Iñaki Peruarena Ansa kazetariak.