Atez Atekoa alboratu edo zalantzan duten udalez iritzia eman du GZZk

Atalak: Atez Atekoaren alde, Gizarte eragileak

Gipuzkoa Zero Zabor koordinakundeak plazaratu du “Zero Zabor mugimenduaren jarrera bermerik gabeko proposamenen aurrean” agiria, non bere hausnarketa egiten duen sortutako giro gatazkatsuaren erreakzioz Atez Atekoa ezartzeko erabakian atzera egin duten udalen jarrera eta gaikako bilketa borondatezkoarekin birziklatze portzentai handietara iristeko promesa egin dutenena.

Zenbait iritziemailek eta agintarik txalotu dituzten adostasunak kritikatu ditu GZZk: “Adostasunak eta kontsentsuak gauza desiragarria dira, beti ere arazoak konpontzeko badira. Amildegian behera salto egiteko edota arazoari irtenbide errealik ez emateko ados jartzea aldiz larria da”.

Nabarmendu ondoren Zero Zabor bidean bermearen froga Atez Atekoak beste inork ez duela eman, inon emaitza onik erakutsi ez duten ereduekin espekulatzea salatu du GZZk: “Emaitza ona ematen duela FROGATU ez duen sistema batekin helburua beteko dela esatea kea saltzea da. Kezkagarria da zenbait herritako politikariek irtenbideari muzin nola egiten dioten ikustea. %60, %80 gaika biltzeko helburua adostu, eta akordioan zehaztutako gauza bakarra, helburu hori erdiestea bermatzen duela erakutsi duen bilketa sistema bakarra baztertzea izan baita”.

Agintariei gogorarazi ostean Gipuzkoa Zero Zabor norabidean eramateko plana idatzita dagoela iaztik, GZZk honako oharrarekin bukatu du agiria: “Gipuzkoak ezin du presio politiko elektoralisten eta elite baten interes ekonomikoen biktima izaten segi. Gipuzkoa Zero Zabor mugimendutik, bidea zein den erakutsiz ausardiaz eta arduraz jokatu duten arduradun politikoak zoriondu nahi ditugu, eta gainerakoei, beti eman izan dugun mezu argia gogorarazi. Zero Zabor norabidean joateko bidelagun izango gaituzte, Zero Zabor  norabidean pausu okerrak ematen badira, salatuko dugu.”