Eskoriatzan %70 birziklatzeko oinarriak adostu dituzte EAJ eta Garbia ez besteek

Atalak: Udalak

Udalaren gobernua aukan Bilduk, Ezker Anitza-IUk, PSEk eta Eskoriatzako Zero Zaborrek adostasuna lortu dute gutxienik %70 birziklatzea bideratuko duten sistema abian jartzeko. Bilketa sisteman oraindik adostasunera heldu ez diren arren, puntuotan bai datoz bat Goienak “Hondakinen %70 birziklatzeko akordioa lortu dute Eskoriatzan” kronikan azaldu duenez:

“- Ahalik eta gehien birziklatze aldera, egungoa baino emaitza hobeak lortuko dituen hiri hondakinen kudeaketarako sistema baten alde egitea berresten dugu, bilketa osasungarri, jasangarri eta bideragarriaren alde, alegia. Horrela, gutxienez, %70eko gaikako bilketa maila lortzea ziurtatuko duen sistema ezarriz.
– Bilketa sistema berrian materia organikoa berezita jasoko da derrigorrez, frakzio hori baita ugariena gure zabor poltsetan, eta arazo gehien ematen duena zabortegietan.
– Era berean, errefusa ezingo da 24 orduz eskuragarri egon, hau da, ordutegia eta egutegia izan beharko ditu, bere garaian finkatuko direnak.
– Erabakitako sistema ezarri baino lehen, hondakinen kudeaketaren berri emango da, informazio egiazkoa, gardena eta objektiboa emanez. Lehenengo kanpaina Zer egiten da gaur egun Eskoriatzako zaborrarekin?lemapean egingo da, eta behar beste kanpaina egingo dira helburua lortu arte.
– Sistema ezarri ondoren, aldiro ikuskatuko da jarritako helburuak lortzen diren ikusteko; horrela ez balitz, beharrezko hobekuntzak eta aldaketak  egingo dira”.

Eskoriatzako hondakinen mahaian datorren astean hasiko omen dira bilketa zehazteko eztabaidetan. Aldiz, hondakinen mahaian parte harturik ere ez dute adostutakoa onartu ez EAJk eta ez jelkideek sustatzen duten Eskoriatza Garbia plataformak. Hauek esan dute herrian 1.500 herritarren sinadurak bildu dituztela 5. edukiontziaren alde eta sistema hori baizik ezin dutela onartu.

Albiste gehiago beste hedabideetan:
Goiena “PSE-EEk bidegabetzat jo ditu plataformak alderdiei buruz esandakoak”
Noticias de Gipuzkoa “Eskoriatza pacta llegar a un nivel de reciclaje del 70%”
Diario Vasco “La mesa de residuos llega a un acuerdo sobre las características del sistema de recogida“