Lazkaokoekin, 97.662 gipuzkoarren hondakinak bilduko dira Atez Ate

Atalak: Atez atekoa, Orendain eredua, Udalak

Abuztuan Pasai Donibane (2.280 biztanle) sartuta eta Lazkaoko 5.435 herritarrak urriaren 4an, gaur zortzi, hasiko direnean beren hondakinak gaika sailkaturik Atez Ate biltzen, Gipuzkoan 97.662 jende ariko da sistema honekin funtzionatzen. Joan den uztai hasieran 71.579 ari ziren, eta horiei gehitu zaizkie udatik hona Ordizia, Amasa-Villabona, Segura, Pasai Donibane eta Lazkao. Aipatutako zifrak biltzen ditu Zero Zabor herri txikiak: Orendain, Altzo, Orexa, Elduain eta Leintz-Gatzaga. ARGIAren kontabilitatearen arabera, une honetan gipuzkorren %13,76 bizi da Zero Zabor ereduan ari diren udalerrietan.

Bestalde, Gipuzkoakoei gehitu behar zaizkie joan den uztailetik Atez Atekoan edo Zero Zabor herri txikien ereduan ari diren Sakanako herrietako 10.775 biztanleak. Horrela, Euskal Herri osoan gaikako bilketa orokortu edo hondakinen Zero Zabor ereduan bizi dira Euskal Herriko 108.437 herritar.