Balkoietan plastikozko zorroak zintzilikatu ordez pegatinak kuboetan?

Atalak: Atez Atekoaren kontra

Lazkao Birziklatzeneko ordezkariak pegatina aurkezten (Argazkia: Hitza – Aimar Maiz)

[Pello Zubiria Kamino] Lazkaon, urriaren 4an hondakinak Atez Ate biltzen hasiko direla eta, sistema honen kontrako Lazkao Birziklatuz taldeak herritar guztiei pegatinak banatuko dizkie bilketarako udalak banatu dituen kuboetan erantsi ditzaten. Hitzak “Atez atekoarekiko desadostasuna eranskailu bidez adierazteko eskatu du Lazkao Birziklatuzek” kronikan eta Diario Vascok “Lazkao Birziklatuz pide a los vecinos que coloquen pegatinas contra el PaP en los cubos” albistean jaso dutenez papertxo horiek “No estoy de acuerdo – Ez nago ados” esaldia erakusten dute. Taldearen ordezkari Agurtzane Lasak kazetariari argudiatu dio: “Udalak dio familien %83k dagoenekoz jaso dituztela baldeak, baina jasotzera joan direnei ez diete galdetu ados dauden”.

Herritarrei deia Atez Atekorako balderik hartu ez dezaten (Argazkia: Urko Apaolaza)

Orain arte Atez Atekoaren kontrako taldeek erabili dituzten tekniken artean berria da eranskailuen hau. Berrikitan Lazkaon udalak jakinarazi zuenean hastera zihoala Atez Atekorako materialen banaketa, Lazkao Birziklatuz taldeak afixak zintzilikatu zituen jendeari eskatuz ez joateko materialen bila, Urko Apaolazak zabaldutako irudian ikus daitekeenez. Aurretik, joan den martxoan, taldeak herritarrei eskatu zien Atez Atekoa ezartzea iragarri den beste zenbait herritan bezala hemen ere plastikozko zorroak zintzilikatu zitzatela balkoi eta leihoetatik, Diario Vascok “Lazkao Birziklatuz llama a colocar bolsas de basura en los balcones contra el PaP” kronikan azaldu zuenez.

Lazkaora hurbiltzen direnek, eta zer esanik ez bertakoak izanik herriak itxura txukuna edukitzea maite dutenek, eskertuko dute Atez Atekoaren kontrakoek birziklatze orokortuaren kontrako protesta sistema aldatu izana. Baldin eta balio badu balkoietako zorro itsusi horiek desagertzeko.