Ikaztegietan ere laster Atez Atekoa

Atalak: Atez atekoa, Mankomunitateak, Orendain eredua, Udalak

Tolosaldeko Ikaztegietan (469 biztanle) laster Atez Ateko bilketa ezarriko duela iragarri du udalak. Mankomunitateak bere webgunean “Atez ateko bilketa nola izango den informatzeko gizarteratze prozesua Ikaztegietan” zabaldu duenez, mankomunitateko eta udaleko teknikari eta hautetsiek marraztu dituzte ezarpenaren ezaugarri nagusiak eta herritarrekin eztabaidatu dituzte hilaren 18 eta 19an. Ikaztegieta bi eremutan banatu dute: landa eremukoek giltzaz ireki ahal izango duten bilketa guneetan lagako dituzte hondakinak gaika sailkaturik (Atez Atekoa egiten den herri guztietan horrela egiten dute aparte bizi diren baserri eta beste etxeetakoek) eta kaxkokoei atez ate bilduko zaie. Ikaztegietako etxeek ez dute zintzilikariorik edukiko, altuera apaleko etxeak izanik ontziak lurrean utzita ondo moldatuko direlako. Ikaztegietaren aurretik Tolosaldean sistema berrian sartu dira Alegia, Irura, Anoeta, Zizurkil eta Amasa-Villabonan. Horiez gain, Orendain, Elduain, Orexa eta Altzo Zero Zabor herri txikien ereduan hasita daude eta bide beretik urratsak aurreratzen ari dira Aduna (452 biztanle), Asteasu (1.512), Berastegi (1.062) eta Lizartza (649).