Tolosako udalak aurkeztu du bost bilketa sistemaren arteko alderaketa

Atalak: Atez atekoa, Bost edukiontzi txipdunak, Bost kontenedore, Sistema mixtoa, Udalak

Tolosan hondakinen bilketa berri bat antolatzeko prozesua aro erabakitzailean sartu da atzo asteartez, urriak 22, herritarrei udalak egindako aurkezpenarekin. Bertan udal agintariek aurkeztu dute Idema ingeniaritza enpresak, (blog honek “Idemak bi hilabetetan egin beharko du Tolosarako hondakinen plan berria” albistean iragarri zen moduan) bost sistemaren artean egindako alderaketaren emaitza. Tolosaldeko Atariak “Hondakinen bilketa sistema berria erabakitzeko azken urratsak” albistean laburbildu ditu zein diren aztertutako bost sistemak: “Bosgarren edukiontzia, derrigorrezko 5. edukiontzia, atez ateko biketa sistema mistoa, atez ateko bilketa eta edukinontzi komunitarioen bidezko bilketa sistema”.

Diario Vascok “Cuenta atrás en el proceso de definir el sistema de recogida de basuras” albistearen atarikoan azaldu bezala, “Los métodos de carácter obligatorio son los mejor valorados por Idema“. Bilkuran egondakoek garbi ulertu zuten azalpenean emaitzarik onenak hondakinen Atez Ateko bilketak eskaintzen dituela. Idemak, bestalde, azpimarratu du Tolosa irla ez denez, inguruko herriek hautatu duten sistemarekin uztartzeak sinergiak ekarriko lituzkeela. Zehazki Idemaren txostenak dioena ezagutu nahi duenak bi dokumentu dauzka eskueran: herritarrei aurkeztutako  “Tolosako udalerriko hondakin kudeaketarako sistemen arteko konparazio-azterketa” laburbilduma eta gaztelaniaz txostenaren “Análisis comparativo de los diferentes sistemas de recogida” atala.

Ondorengo hilabeteetan Tolosako udal batzak erabaki behar du zein sistema ezarri herrian. Udal gobernu taldea osatzen dute Bilduk (Ibai Iriarte alkatea buru) eta Aralarrek (Inaki Irazabalbeitia dauka zinegotzi).

[2013-10-24, eguneraketa] Tolosaldea Txukunek, udalak egindako aurkezpenaren ondotik, aldarrikatu du Atez Atekoaren ezein modalitate ez dela herri horretarako egokia eta bostgarren edukiontzi derrigorrezkoa defenditu du, Diario Vascok “Ningún sistema de PaP es asumible económicamente en Tolosa” albistean argitaratu duenez.