Ondarroa: Kontainerren usaina ez jasatearren, konposta egiten

Atalak: Auzolaneko konpostaketa, Bizkaia, Udalak

Txaro Etxaburu Ondarroan konposta egiten (Argazkia: Hitza)

[Pello Zubiria Kamino] Herritarren konpostaren arrakasta Gipuzkoan hasi ez den bezala amaitu ere bertan ez dela egiten aitortu dugu azken Larrunen, aipatuz Nafarroako Sakanak lortu dituen markak eta lurralde horretako beste zenbait herritan egiten ari direnak, Bizkaian Larrabetzun egiten dutena ere bai… Tamalez, izendatu gabe bidean galduta Ondarroakoa utzi genuen. Ez du bazterrean lagata geratzea merezi.

Hitzan Larraitz Ibaibarriagak argitaratutako “Naturak emandakoa, naturara” kronikan kontatu du nolaz dagoenekoz 20 familia ari diren Ondarroako lehen konpost gunean beren organikoa ongarri bihurtzen. Ibaiondoko gune horri laster gehituko omen zaio bigarren bat, Artibai kalean udala antolatzen ari dena, eta agintariek jakinarazi dute urtea amaitzerako gehiago egongo direla martxan. Ondarroako udala “Egin konposta zeure auzoan” kanpaina ari baita sustatzen herritarren artean.

Ondarroan, konposta egiten hasteko honako argudioa eman dio kazetariari Txaro Etxaburu Solabarrietak: “Kontainerretako usaina ez dudalako jasaten animatu naiz konposta egitera“. Gipuzkoan Errenteriako Beraunen eta Zumaian bezala Nafarroan Iruñeko Sanduzelain eta beste zenbait lekutan karrikan herritarrek konposta egitearen kontra  ari direnek bisita egin behar liekete ondarrutarroi.

Bestalde, Ondarroako udalak hondakinen kudeaketari buruzko parte hartze prozesua abian jarri du, gaur bertan, urriak 28, eta bihar burutuko diren batzarrekin. Hitzak “Birziklatze tasa hobetzeko kanpaina ipiniko dute martxan Ondarroako Udalak eta Elhuyar Aholkularitzak” albistean dioenez, “gaur egun %25ekoa da tasa, eskualdean baino %2 baxuagoa. Tasa ‘onargarria’ izan dadin, eta 2014. urtean ezarri nahi den hondakinak biltzeko sistemarik egokiena aukeratzea helburu, Ondarroako Udalak hondakinen kudeaketaren gaineko gogoeta egin nahi du herritarrekin batera: urritik abendura bitartean adostu nahi du hondakinak biltzeko sistema herriko eragile, elkartea eta banakoekin. Gaiari sakontasunez kolpe egin nahi dio udalak: lehenengo eta behin, gaiaren inguruko ezagutza eta gogoeta sustatu nahi du, eta ondoren, informazioa eskuan edukita, herriarentazkao egokia den biltzeko sistema erabaki.”

Ondarroako parte hartze prozesuaren afixa (Iturria: Turrune)