Astigarragan Atez Ate urte betez

Atalak: Atez atekoa, Udalak

Apiril hasieran urtea bete dute Astigarragan hondakinak atez ate biltzen  hasi zirenetik. Urumeako Kronikak [Hernaniko Kronika duela gutxi hasi da Astigarragatik Goizuetarainoko albisteak biltzen astean behin, Urumeako edizioan] tarte zabala eskaini dio gaiari, duela urte bete polemika beroan orria franko eskaini zioten hedabide handiek ez bezala. Albiste onak ez bide dira albiste.

Gaikako bilketa Astigarragan 2013ko martxoan eta aurtengoan (Irudia: Urumeako Kronika)

Hondakinenen kudeaketaren datu nagusiak bildu dituzte “Astigartarrek hondakinen %83a biltzen dute gaika, lehen baino ia hiru aldiz gehiago” kronikan. Udalaren datuen arabera, atez atekoarekin, astigartarrek hon­dakinen %82,95a biltzen dute gaika eta lehen, lau kontenedorerekin, %29,16a. Beraz, gaur egun, %17,05a da zabortegira doan errefusa eta lehen, %70,84a.

Datu orokorrez gain, udaleko hiru alderdi politikoei eta hondakinen gaian Astigarragan mugitu diren bi taldeei eskatu diete iritzia. Hona:

Andoni Gartzia, alkatea (Bildu) “Hondakinen bilketari iraulia eman diogu”
EAJ-PNV “Bilduk beste interes batzuen alde egin du eta inposaketa justifikatzeko, ipuina asmatu du”
Hamaikabat “Udalak ematen dituen datuak faltsuak dira falta den zabor erdia ez baitu datuetan sartzen”
Astigarraga Zero Zabor “Arazo haundia dugu oraindik hondakinen gaiarekin, baina pausoz pauso bagoaz”
Astigarraga Garbia “Zaborraren %36a ez da herrian jasotzen, herritar askok egiten du protesta isila”