Uztailaren 3a, plastikozko zorrorik gabeko eguna

Atalak: Plastikozko zorroak, Zero Waste Europe

[Pello Zubiria Kamino] Mundu osoan barrena Plastikozko Zorrorik Gabeko Eguna ospatuko da uztailaren 3an, urtero bezala. Azken hamarkadetako uholde kontsumistak banalizatu dituen erabilera bakarreko poltsa kaltegarri horiek debekatzea eta bitartean murrizten ahalegintzea da nazioarteko egunaren helburua, planeta osoko hainbat hiri eta herritako ekitaldietan mamituko dena.

Plastic Bag Free Day mugimenduaren webguneak honela laburbildu ditu zorroak dakartzan kalteak:
– zorro bakoitza ez da erabiltzen 25 minutu baino gehiagoz.
– desegiteko, aldiz, 100 eta 500 urte artean behar ditu (segun eta zein plastiko motaz egina dagoen).
– munduan minutu bakoitzeko milioi bat plastikozko poltsa erabiltzen da.
– Europako biztanle bakoitzak urtean 500 poltsa plastikozko usatzen ditu.
– itsasoak kutsatzen dituen zabor gehiena, %80tik gora, plastikozko zorroz osatuta dago.
– munduak urtean 3,4 milioi tona plastiko-zorro ekoizten du.

Hain erabilera laburreko eta desegiteko hain denbora luzea behar duten zorrok hain merke izatearen gakoa kosteen externalizazioan datza: horien prezioan ez dira kontutan hartu ez ekoiztean eragindako kutsadura, ez desegiteko bide luzean jendeen osasunari bezala ingurumenari eragingo dizkioten kalteak. Hain masiboki erabiltzen den plastiko hau aspaldi iritsi zen gizakien eta abereen elikadura katera.