Italiako Desion errauskailua merkatuak itxi du: inork kudeatu nahi ez

Atalak: Ekonomia, Errausketa, Europa

Errausketaren aurkako protesta Desioko plantaren atarian (Argazkia: Il Giornale)

[Pello Zubiria Kamino] Lonbardiako Eskualde Kontseiluaren kide den Gianmarco Corbettak (MoVimento 5 Stelle) eman du albistea, guk Enzo Favoinoren bitartez ezagutu duguna: “Clamoroso: deserta la gara per il revamping del forno di Desio!“, alegia, Monza hiritik hurbil dagoen Desioko errauste planta zaharberritzeko lehiaketa publikoan ez dela enpresa bakar bat agertu. 40 urtez inguruko hondakinak kiskaltzen aritu den errauste plantari agintariek bizia luzatu nahi zioten 18 urte gehiagotarako. Lehiakiderik gabe geratu den Desioko proiektuak denetara 33 milioi euro inbertitzeko helburua zuen.

Corbettak salatu duenez bere blogean, Bea [errauskailua kudeatzen duen] konpainiako buruzagiek eta alkateek  diete entzun nahi izan hondakinen kudeaketaren mundua aldatu egin dela abisatzen zietenei. Abisatzen omen zieten Lonbardian hondakinak gutxitzen ari direla eta hala segituko dutela; Eskualdeko gobernua bera errauskailu zaharrenak ixten joan nahi duela… “Baina azken soldadu japoniar haiek bezala galdutako gerrarekin aurrera jarraitu nahi izan dute, Desioko errauste planta zaharra zaharberritu eta handiagotzeko planekin. (…) Orain merkatuak erabaki du zentzugabeko proiektu hau bertan behera geratzea”.

Albistea Twitterrez zabaltzean Enzo Favoinok komentatu du: “Diru-laguntzarik edo Europar Batasunaren bermerik ezean, inork ez du inbertitzen errausketan”.

“