Gipuzkoa Zero Zabor kontainer berdea kaleetatik kentzeko eskatzen (bideoa)

Atalak: Errefusa, Gipuzkoa, Gizarte eragileak

Gipuzkoa Zero Zaborrek (gaur Zero Zabor ingurumenaren babeserako elkartea) guda dantza irudikatzen duen bideo batekin ekin dio kanpaina berriari, zeinarekin agintariei eskatzen dien zabor nahasiak onartzen dituzten kontainer handi libreak ken ditzatela kaleetatik. “Zabor edukiontzia birziklatzera!” izena eramango duen bideoa Donostiako Easo plazan grabatu dute. Elkarteak bere blogean aldarrikatu duenez, “zabor edukiontzia kentzen denean gaikako bilketan jauzi ikusgarria ematen dela irakatsi digu esperientziak. Guk ez diegu agintariei nola egin esango, soilik beraien betebeharra bete dezatela eskatzen dugu, gaikako bilketa eraginkor bat berma dezatela, arazoa sortzeko bitartekoak ken ditzatela eta gizon-emakumeon eskubideak zain ditzatela.”

Nerea Lizarraldek Irutxuloko Hitzan azaldu duenez, zabor edukiontzia desagertzeko kanpaina kalera aterako du Gipuzkoa Zero Zaborrek. Donostiako erdialdeko zenbait edukiontzi aukeratu eta zigilatu egingo dituzte, hondakinak nahasteak zaborra sortzen duelako, eta ondorioz, osasuna eta ingurumena kaltetzen dutelako. Hiriburutik landa, lehen ekitaldia ostiralean (urriak 10) Andoainen egingo dute. Eta kanpaina Donostiara urri bukaeran itzuliko da.