Txingudik GHKn sartzea eskaturik, errauskailua berriro mahai gainean?

Atalak: Mankomunitateak, Partzuergoa

[Pello Zubiria Kamino] Diario Vasco egunkariak gaur Fernando Seguraren kronikari jarri dion titularrak aurreikusten du laster aldatuko dela GHKn erraustegiaren alde eta kontra dauden indarren arteko indar banaketa: “Las mancomunidades a favor de la incineradora tendrán más votos en GHK que las contrarias“. Bertan dioenez, Madrilgo Auzitegi Gorenak ebatzi du GHKk bere baitan onartu beharko duela Irun eta Hondarribia biltzen dituen Txingudi mankomunitatea. 2009an GHKk lehendakari Carlos Ormazabal (EAJ) zuela onartu zuen Txingudi sartzea partzuergoan baina San Markoko lehendakari Ricardo Ortegak (Ezker Batukoa orduan) helegitea jarri zuen,  zuzendaritzak barne arauak legez kontra urratu zituelakoan. Auzitegiak Txingudiren sarrera hori eragotzi zuen 2010eko epaian.

Segurak DVn azaltzen duenez oraingoz GHKn nagusi den indarrak -EHBildu- atxikiko luke agintea Gipuzkoako Foru Aldundiak partzuergoan botoen %33 dauzkanari esker. Aldiz, errauskailua eraikitzearen alde dauden Txingudik, San Markok eta Debabarrenak nagusitasuna leukakete bototan errauskailuaren kontra ari diren Urola Kosta, Urola Erdia, Debagoiena, Sasieta eta Tolosaldearen aurrean. Egunkari berak informatu duenez dagoenekoz Txingudik eskatu du GHKn sartzea. Diario Vascok albistearen barruan Martin Garitanori oroitarazten dio agindu duela mankomunitateek onartutakoa ontzat emango duela Foru Aldundiak.

Beranduago San Marko, Debabarrena eta Txingudiko ordezkariek emandako prentsaurrekoan garbi adierazi dute berriro Zubietako errauskailua mahai gainean jartzeko asmoa dutela: “La entrada de Txingudi (Irun y Hondarribia) formará un bloque mayoritario, junto a San Markos y Bajo Deba, en favor del plan de residuos aprobado en la pasada legislatura“.

Historia berrituz, Txingudin zen egitekoa Gipuzkoako bigarren errauste planta. Txingudin abiatu ziren errauskataren kontrako Gipuzkoako lehen mobilizazioak eta azkenean asmo hori bertan behera utzi zuten. Geroztik Txingudiko arduradunek -PSEren eskuetan dago mankomunitatearen agintea- oso gogor jo dute Gipuzkoan beste errauskailua eraiki dadin, Zubietan joatekoa zena. Aldiz, Txingudin eraikitzekoa zen Zaldunbordako konpost planta ez zen sekula hasi ere egin: 2009rako lanean aritzekoa zen.

[P.D.]Albistea beste hedabideetan:
Hitza “Txingudiko Zerbitzuak-en alde egin du Espainiako Auzitegi Gorenak”
Gara “La Mancomunidad de Txingudi admite que no sabe qué va a hacer con los residuos“.
Noticias de Gipuzkoa “Piden a la Diputación que respete la nueva mayoría del Consorcio”