Zizurkilgo udala: ‘Galdeketak ez ditu baldintza demokratikoak betetzen’

2013-06-21 // Atez Atekoaren alde, Atez Atekoaren kontra, Udalak // Iruzkinik ez

Zizurkilgo udal agintariak prentsaurrekoan.

Zizurkilgo Udaleko Bilduko zortzi hautetsiek, Nerea Lizarralde alkateordea buru, herrian asteburu honetarako Tolosaldea Txukunek deitutako herri galdeketak «gutxieneko baldintza demokratikoak ez dituela betetzen» salatu dute, baieztapen hori sostengatzen duten argudioak azalduz. Horren berri eman du Hitzak “Galdeketak ‘baldintza demokratikoak ez dituela betetzen’ salatu du Zizurkilgo Udalak” albistean. Hedabide berak bildu du galdeketa antolatu duen Tolosaldea Txukunen erantzuna: “Etxean ez geratzeko eta bozkatzera joateko deia egin du Tolosaldea Txukunek“. Aiurrik publikatu du “Aurreiritziak baztertu eta atez atekoari aukera emateko eskatu die Udalak herritarrei“, “Erraustegiaren aldekoak zizurkildarrak engainatzen ari direla uste du Jose Mari Luengo alkateak“.

Diario de Noticiasek ere bildu du udal agintarien iritzia, “El alcalde de Zizurkil califica de ‘irresponsable’ la consulta sobre el ‘PaP“, Tolosaldea Txukunen deialdiaz gain: “Llamamiento a la “participación masiva” en la consulta de Zizurkil“. Udalaren prentsaurrekoaren berri eman ez duen Diario Vascok gai beraz bi albisteok eskaini ditu: “Tolosaldea Txukun anima a la participación en la consulta de este fin de semana en Zizurkil” eta “PSE-EE de Zizurkil dice que la consulta será un ‘termómetro del hartazgo ciudadano contra Bildu‘“. Arantxa Zabala zizurkildarrak gutuna plazaratu du: Hitzan “Zizurkildar talde baten gutuna galdeketaz” Noticias de Gipuzkoan “Consulta en Zizurkil“.

Aretxabaletan 5. edukiontzia zabaltzea eskatzeko 1.704 sinadura

2013-06-20 // Atez Atekoaren kontra, Bost kontenedore, Gizarte eragileak // Iruzkinik ez

Goienak jakinarazi duenez “Bosgarren edukiontzia Aretxabaleta osora zabaltzea eskatu dute” albistean, Atxabalta 5 Alde elkarteak 1..704 sinadura bildu ditu Atez Atekoaren kontra.

Seguran uztailaren 4an hasiko dira hondakinak Atez Ate biltzen

2013-06-20 // Mankomunitateak, Udalak // Iruzkinik ez

Ezkerretik, Andonegi, Gerriko alkatea eta Telleria zinegotzia (Arg.: Hitza)

Goierriko Seguran (1.477 biztanle) uztailaren 4an hasiko dira hondakinak Atez Ate biltzen, herriko alkate Eluska Gerrikok, zinegotzi Ibai Telleria eta Sasietako mankomunitateko lehendakari Azeari Andonegik prentsaurrean azaldu dutenez. Aste honetan sistema bera abian jarri duten Alegia, Zizurkil, Anoeta eta Iruraren ondoren, Gipuzkoan Atez Atekoan funtzionatzen duen 14. herria izango da Segura. Uztailaren 4an Gipuzkoak denetara dauzkan 709.607 biztanletatik 66.5703 izango dira hondakinak Atez Ate bilduko zaizkienak; Oñati, Amasa-Villabona, Ordizia eta Lazkao hasiko direnean, 98.848 ariko dira Atez Atekoarekin, horietan zenbatu gabe organikoa osorik herri barruan kudeatzen ari diren herri txikiak.

Albistea bildu dute Naizek (“Uztailaren 4an jarriko dute martxan Seguran atez ateko zabor bilketa sistema“), Berriak (“Seguran uztailaren 4an hasiko dira atez ateko bilketa sistemarekin“), Hitzak (“Atez ateko zabor bilketa sistema uztailaren 4an jarriko dute martxan Seguran“) eta Diario Vascok (“Segura implantará el PaP el 4 de julio“).

Sasieta mankomunitateak ‘Eman aukera Atez Atekoari’ bideoa zabaldu du

2013-06-20 // Atez Atekoaren alde, Mankomunitateak // Iruzkinik ez

Sasieta mankomunitateak sarean ipini du “Eman aukera Atez Atekoari” bideoa. 5’42”ko iraupena daukan filmean une honetan Goierrin eta Gipuzkoan sortzen diren zabor kopuruen datu nagusiak, Sasietak urteotan bosgarren edukiontziarekin lortutakoa eta hemendik aurrera Atez Ateko bilketarekin lortu nahi duena kontatzen dira. Hondakinen arazoa jolas batekin irudikatzen duten amona-bilobez gain, Azeari Andonegi mankomunitateko lehendakariak aurkezten ditu plan berriaren lerro nagusiak eta Zaldibiako herritarrek azaltzen dituzte Atez Atekoarekin nabaritutako aldaketak.

Karasatorrek defenditu du Atez Atekoak enplegua sortzen duela Sakanan

2013-06-20 // Atez Atekoaren alde, Ekonomia, Mankomunitateak // Iruzkinik ez

Aitor Karasatorre (Arg.: Dani Blanco)

Sakanako mankomunitateko lehendakari Aitor Karasatorrek Gara egunkarian plazaratutako “PP: mentiras y escaqueo” iritzi artikuluan defenditu du Nafarroako eskualde honetan ekainaren 27an abiaraziko den hondakin bilketa sistema berriarekin enpleguak sortu direla bailaran eta lekuko enpresa askori lana eman zaiola. Bestalde, Atez Ateko bilketaren aurrean bosgarren edukiontzia defenditzen dutenei erantzun die aukera hori auzokonpost guneekin bermatzen diela herritarrei mankomunitateak.

Ordizian Atez Atekoaren kontrako galdeketa berotzen

2013-06-20 // Atez Atekoaren alde // Iruzkinik ez

Ekainaren 29 eta 30erako antolatu dute herri galdeketa Atez Atekoaren kontrako plataformek, albiste honetan aurreratu genuenez. Aldeko zein kontrako, beren argudioak azaltzen ari dira egunotan. Adibidez, ezker abertzaleak honako agiri hau plazaratu du herritarren artean galdeketa egitekotan kontutan hartu beharko liratekeen galderekin. Ordiziako jendeak atsedenerako asko erabiltzen duen Oiangu mendixka gainean errauskailua ipinitako foto-muntaiaz edertua da panfletoa. Honela bukatzen da ordiziarrei zuzendutako idatzia: “Onartuko al genuke errauskailu bat Oiangun? Onartuko al genuke Beasainen kontsultatzea errauskailua Oiangun edo Trevijanon egin behar den?” Trevijano izenez ezagutua da Ordiziako rugby taldearen zelai historikoa, Ordiziako euskara zerbitzuaren arabera jatorriz Urazandia izeneko soroetan ezarria.

Ordizia, galdeketa baterako beste galderak

Lazkao Atez Atekoa ezartzeko bidetik

2013-06-19 // Atez atekoa, Udalak // Iruzkinik ez

Lazkaoko udal agintariak pentsaurrekoan (Arg.: Aimar Maiz)

Ekainaren 25etik hasita uztailaren 10a arte luzatuko dira Lazkaon (5.435 biztanle) Atez Atekoa herritarren artean zehazteko bilerak. 25ean lehen batzar orokorra egin ostean, auzo eta sektorekako (merkatariak, zaharrak…) sei gehiago daude programatuta, azken batzar orokorra uztailaren 10ean egiteko. Prentsaurrean aurkeztu du prozesua herriko alkate Azeari Andonegik (Sasieta mankomunitateko presidentea ere bera da), ondoan zeuzkala Enrike Enparantza eta Andoitz Garmendia zinegotziak. Lazkao izango da Atez Atekoa ezarriko duen Goierriko seigarren herria; Itsasondo, Legorreta, Zaldibian martxan dago dagoenekoz, Ordizia izango da hurrengoa eta Berriak zabaldu duenez gaur aurkeztuko omen da Seguran sistema berriak edukiko duen zehaztapena.

Informazioa osatzeko:
Hitza “Lazkaon ekainaren 25ean hasiko da atez atekoa zehazteko prozesua”
Diario Vasco “El proceso para implantar del PaP en Lazkao arrancará el próximo martes”
Sasieta mankomunitatea “Lazkao ere martxan” eta “Lazkao se une al PaP“

Atez Atekoaren kontrako plataformak dimititzeko eskatu Arrasateko alkateari

2013-06-19 // Atez Atekoaren kontra // Iruzkinik ez

Goienak ezagutarazi duenez, “Arrasate Garbik dimititzera gonbidatu du alkatea, ‘arrasatear gehienak asebetetzeko gai ez baldin bada’“. Atez Atekoaren kontrako plataformak hitzokin bukatu du bere idatzia: “Noiz arte jarraituko duzu zure burugogorkerian, Alkate Jauna? Gai honetan arrasatear gehienok asebetetzeko gai ez baldin bazara, Bergarako alkateak hartu duen antzeko pausoa hartu beharko zenuke, dimititu”.

Gipuzkoako auzokonposta zifratan: 1.464 familia martxan, 1.131 zain…

2013-06-18 // Auzolaneko konpostaketa // Iruzkinik ez

Auzokonposta egiten Hernanin (Arg: Gotzon Aranburu)

[Pello Zubiria Kamino] Gipuzkoak bizi duen hondakinen kudeaketa aldaketan, Atez Atekoaren kontrako zalaparta nagusiaren bazterrean kasik oharkabean, fenomeno sozial berri eta oso berezia ari da zabaltzen: auzokonposta. Herritarrek auzolanean beren etxeetan sortu hondakin organikoak kudeatzea, alegia. Munduko leku askotan egiten dena izan arren, harrigarria da hemengo herritarren artean lortu duen arrakasta. Hemen batu ditugu Gipuzkoa osoko datuak, Usurbil Zero Zaborreko kideek egindako bilketa lanari esker.

Alde batera utzirik bakarka baratze edo jardinean konposta egiten duten familiak, 2013ko ekainean Gipuzkoan 1.464 familia ari dira etxeetan sortu txerri-jana auzolanean konpost bihurtzen. Horien ondoan, gutxienez 1.131 familia gehiago daude gauza bera egiteko izena emanda. Hemen ez ditugu kontabilizatu multzo handitan organikoa konpostatzen duten ikastetxe, elkarte eta bestelakoak, solik udalak eskainitako sail eta azpiegituretan auzokonposta egiten duten familiak baizik. Guk dakigula, 2011ko azaroan estreinatu zen gisa honetako lehen esperientzia, Usurbilen. Ondoko 19 hilabetetan Gipuzkoa osora zabaldu da ahalegina.
(gehiago…)