Basque Yourself: unibertsitarioak ala turistak?

Atalak: DSS2016EU, Hiri eredua

“Ametsetako uda bizi nahi duzu Europako Kultur Hiriburuan, Donostian? Euskal Herriko Unibertsitateak, euskal unibertsitate-sistemako liderrak, ‘Basque Yourself 1st International School’ kurtso erakargarrian parte hartzeko aukera eskaintzen dizu”. Esaldia EHUren webgunean irakur daiteke, Donostia 2016rekin lotuta eta Etxepare Institutuaren parte hartzearekin antolatu duen ekimena iragartzen.

Unibertsitate-ikasketa hauek promozionatzeko egin duten spotean haur bat pilotan jokatzen ikusten dugu. Topiko-sortaren hasiera baino ez da, gero datoz euskal dantzak, txalaparta, Euskal Herria lau haizetara programa gogora ekartzen duten airetik grabatutako paisaiak eta… ikusi behean gainontzekoa.

Off-eko ahotsak esaten duen zerbaitek deitzen du arreta: bideoaren arabera, “ingurune lagunkoi eta segurua” da Euskal Herria –tira, bideoak Araba, Bizkaia eta Gipuzkoaren mapa erakusten du–; alegia, “etor zaitezke, ez dago lehen zegoen arriskurik”.

Marseillako Kultur Hiriburuaren bestondoaz diharduen La fête est finie dokumentalean aipatzen den zerbait dator burura automatikoki: baketutako eremuak behar ditu hiri proiektu berriak, gatazkak ezkutatzea “ekonomia dinamikoa”, “kulturaren ideia irekia” eta “ingurune natural ahaltsua” hobeto erakusteko.

Eta estaltzearen estaltzeaz, problematikoak izan daitezkeen baieztapenak ere pasatzen dira eztarritik. “Frantsesa naiz, Bretainiatik nator”, dio atzerriko ikasle batek, hemen “espainola naiz, Euskadikoa” esan dezakegun bezalatsu.

“Proposamen akademiko eta ludiko” gisa prestatu duten Basque Yourself ekimenaren xede taldea imaginatzea ez da zaila: gaztea, klase ertain-altukoa… “Kalitatezko turista” esaten zaion horren oinarrizko katebegia, Euskal Herrian hilabete pasatzeko 2.500 eurotik abiatzen den faktura pagatzeko gai den norbait.

12 kreditu eta Altza, Herrera eta Larratxo inola ere ez bisitatzeko aukera izango duzu Basque Yourselfekin. Turista unibertsitarioak, welcome to the Basque something.